Դուշանբեում անցկացվել է Էմոմալի Ռահմոնի երդմնակալությունը
Ռուսական ИТАР-ТАСС լրատվական գործակալության փոխանցմամբ՝ Տաջիկստանում այսօր տեղի է ունեցել Էմոմալի Ռահմոնի երդմնակալությունը, ով չորրորդ անգամ անընդմեջ ընտրվել է երկրի նախագահի պաշտոնում:
Միջոցառումն անցկացվել է Դուշանբեի Կոխի Միլլատ (Ազգերի պալատ) շենքում, որը կառուցվել է ոչ վաղ անցյալում: Ռահմոնը երդման տեքստը խորհրդարանի երկու պալատների անդամների առջև արտաբերելուց հետո մայրաքաղաքի գլխավոր հրապարակում ընդունել է բոլոր զորատեսակների մասնակցությամբ զորահանդեսը:
Այլ երկրների ղեկավարները չեն հրավիրվել երդմնակալության արարողությանը: Դրան ներկա են գտնվել Տաջիկստանի կառավարության անդամներն ու պատգամավորները, դիվանագիտական կորպուսը, հասարակության ու ԶԼՄ-ների ներկայացուցիչներ, ինչպես նաև նախագահի ընտանիքը:
Տաջիկստանի ԿԸՀ-ի վերջնական տվյալներով՝ Ռահմոնը նոյեմբերի 6-ին անցկացված ընտրություններում հավաքել է քվեների 84.2 տոկոսը: Էմոմալի Ռահմոնը Տաջիկստանի նախագահ է հանդիսանում 1994 թվականից:
