Զինվորական բժշիկները Պենտագոնի ու ԿԸՀ-ի բանտերում մասնակցել են բանտարկյալներին կտտանքների ենթարկելուն. զեկույց
Ռուսական РИА Новости լրատվական գործակալության փոխանցմամբ՝ ԱՄՆ բանակի բժիշկներն արտոնել են ամերիկյան ռազմական բանտերում ենթադրյալ հանցագործներին կտտանքների ենթարկելը, ինչպես նաև անձամբ են մասնակցել դրանց՝ ի հակադրումն բժշկական էթիկայի:
Այս մասին նշված է բժշկական պրոֆեսիոնալզիմի հարցերով անկախ հանձնաժողովի այսօրվա զեկույցում: 156 էջանոց այդ փաստաթուղթը ստացել է «Էթիկայից հրաժարում. բժիշկների պրոֆեսիոնալիզմը և «Ահաբեկչության դեմ պատերազմում» բանտարկյալների նկատմամբ բռնությունը» անվանումը (Ethics Abandoned: Medical Professionalism and Detainee Abuse in the “War on Terror”):
Զեկույցի պատրաստմանը մասնակցել է ԱՄՆ տարբեր հիմնարկների 19 փորձագետ՝ բժիշկներ, զինվորականներ, իրավաբաններ ու էթիկայի հարցերով մասնագետներ: Նրանք երկու տարի ուսումնասիրել են բաց գրառումներն ու արձանագրությունները, որոնք վկայել են Գուանտանամոյի բանտում, ինչպես նաև Աֆղանստանում ու Իրաքում ամերիկյան ռազմաբազաներում գտնվող բանտարկյալներին կտտանքների ենթարկելու մասին:
Զեկույցում ընդգծվում է, որ Պենտագոնն ու ԿԸՀ-ն ապօրինաբար պահանջել են, որ իրենց հաստիքներում առկա բժշկական աշխատողները մասնակցեն նման կերպ տեղեկատվության ստացման ընթացակարգին, և որ նրանք (բժիշկները) ծանր տառապանքներ են պատճառել բանտարկյալներին: Պենտագոնի ներկայացուցիչ, փոխգնդապետ Ջ. Տոդդ Բրիսիլն այդ մեղադրանքները որակել է որպես «կատարյալ անհեթեթություն»:
