Տարոն Աջեմօղլուն և Դավիթ Գրիգորյանը կվարեն Հայաստանի տնտեսությանը նվիրված ֆորումը
The Armenian Weekly-ի փոխանցմամբ՝ Մասաչուսեթսի տեխնոլոգիական համալսարանի պրոֆեսոր Տարոն Աջեմօղլուն և «Քաղաքական ֆորում-Հայաստան»-ի համահիմնադիր Դավիթ Գրիգորյանը Բելմոնտի Հայկական ուսումնասիրությունների ու հետազոտությունների ազգային ասոցիացիայում, այսօր կազմակերպում են «Հայաստանի տնտեսական զարգացումը. աճի հեռանկարներ և ձախողվելու ռիսկեր» թեմայով ֆորում:
Այդ հատուկ ֆորումում աշխարհահռչակ տնտեսագետ Տարոն Աջեմօղլուն անդրադառնալու իր հայտնի գրքին՝ «Ինչո՞ւ են ազգերը ձախողվում. իշխանության, բարգավաճման և աղքատության ծագումը», որը հրատարակվել է 2012 թվականին և որի համահեղինակը Ջեյմս Ռոբինսոնն է:
Գրքում անդրադարձ է կատարված դարերով փորձագետներին հուզող մի շարք հարցերի, թե ինչու են մի շարք պետություններ հարուստ, իսկ մյուսները՝ աղքատ, ինչու են ազգերը տարանջատված հարուստների ու աղքատների, առողջների ու հիվանդների:
Դավիթ Գրիգորյանն իր հերթին անդրադառնալու է Հայաստանի ներկա տնտեսական իրավիճակին՝ խոսելով Աջեմօղլուի հիմնական մոդելի և Հայաստանի ներկայիս տնտեսական մարտահրավերների մասին:
