Ժ. Սէֆիլյան. «Ականատես եղա մի խայտառակ փաստի, որ ազատամարտիկները հանդիպում են հայտնի օլիգարխիայի ներկայացուցչի հետ» (տեսանյութ)
Նախախորհրդարան քաղաքացիական նախաձեռնությունն այսօր Ազատության հրապարակում պետք է անցկացներ հերթական հանրահավաքը, սակայն այն հետաձգվել է: Փոխարենը Նախախորհրդարանի ներկայացուցիչներն այսօր հրավիրել էին մամուլի ասուլիս, որտեղ պարզբանեցին հանրահավաքի հետաձգման պատճառը: Ժիրայր Սէֆիլյանը նշեց, որ հանրահավաքներն իրենց համար ինքնանպատակ չեն, դրանք հիմնականում հետապնդել են կազմակերչպական նպատակ, սակայն հիմա հարմար են գտնում այլ մեխանիզմներ որդեգրել` աջակիցներին կազմակերպելու և տեղյակ պահելու համար:
«Այս հանրահավաքային խառնիճաղանջը, որ ստեղծվել է մեր ժողովրդի համար, անորոշություն է. տարբեր խմբեր, տարբեր շրջանակներ բարձրանում են բեմ և նույն բանն են ասում: Այս անորոշությունից խուսափելու և հնարավորինս հստակություն մտցնելու նպատակով մենք առայժմ կդադարեցնենք հանրահավաքային տակտիկան»,- ասաց Նախախորհրդարանի քարտուղարության անդամ Ժ. Սէֆիլյանը և միաժամանակ իր խոսքն ուղղեց «գործող քաղաքական դաշտի տրամաբանության ներսում գործող ուժերին»:
«Իմ հորդորն է նրանց, որ օր առաջ դուրս գան այդ տրամաբանությունից, որովհետև այնտեղ որևէ լուծում չի լինելու: Այս 20 տարիների ընթացքում մենք ունեցել ենք ընդդիմություն, որը միշտ փորձել է այդ մարտավարությունը կիրառել, և արդյունքը եղել է զրո: Այսօր նույն փորձը շարունակվում է. օգտագործվում է ազատամարտիկների ձևաչափը: Քանի որ ուրիշ ոչ մի այլ հեղինակավոր քաղաքական ուժ չի մնացել մեր երկրում, ստիպված են փնտրել և գտնել այլ հեղինակային շրջանակ, հանգել են նրան, որ ազատամարտիկների խոսքը տակավին մեր ժողովրդի մոտ ընկալելի է, ուստի` «օգտագործենք այս տղաներին»: Այնտեղ կան ազնիվ տղաներ, որոնց հետ ես միշտ կապի մեջ եմ եղել և այս նույն խոսքերն իրենց եմ ասել, հիմա էլ եմ կրկնում` դուրս եկեք այդ ճահճից,- հայտարարեց արցախյան ազատամարտի մասնակից Ժիրայր Սէֆիլյանը,- Ես երկու օր առաջ ականատես եմ եղել մի խայտառակ փաստի, որ ազատամարտիկները հանդիպում են հայտնի օլիգարխիայի ներկայացուցչի հետ (նկատի ունի Գագիկ Ծառուկյանին, տեսանյութը` ներքևում,- Ա.Ս.) և փնտրում են գործակցության եզրեր` երկիրն այս վիճակից դուրս բերելու համար: Սա անհեթեթություն է, սա զավեշտ է: Ինչպե՞ս կարելի է գործակցել այն ուժերի հետ, որոնք, ըստ էության, մասնակից են մեր երկրի կեղեքմանը, մասնակից են եղել մեր ժողովրդի նկատմամբ բիրտ ուժ կիրառելուն: Մենք ոչինչ չենք մոռացել»:
Մենք փորձեցինք ճշտել, թե արդյոք Ժիրայր Սէֆիլյանը գտնում է, թե մի խումբ ազատամարտիկների շարժումը և նստացույցն ուղղորդվո՞ւմ է գործող իշխանության կողմից:
Սէֆիլյանը պատասխանեց, թե այդպիսի փորձեր են կատարվում ոչ միայն իշխանության, այլ նաև այն քաղաքական կամ ընդդիմադիր ուժերի կողմից, որոնք վերջին 20 տարիների ընթացքում, իր խոսքերով, կիրառել են վերոնշյալ անարդյունավետ մարտավարությունը: Շուշիի առանձնակի գումարտակի հրամանատարը կարծում է, որ իշխանությունները նմանատիպ «ուղղորդվող» անձանց ներդրել է ինչպես ազատամարտիկների, այնպես էլ այլ քաղաքացիական նախաձեռնությունների շարքերի մեջ:
«Հիմա նույնպես արդյունքը լինելու է զրո: Ուստի իմ հորդորն է եղել` գոնե այն ազատամարտիկները, ովքեր իրավունք ունեն կոչվելու ազատամարտիկ….որովհետև ոչ բոլորն ունեն այդպիսի իրավունք: Այսօր մեր երկրում ամեն ինչ խառնված է: Ես այդ մարդկանց հետ կապի մեջ եմ եղել, այսօր էլ կապի մեջ եմ: Ես հրապարակային եմ ասում իմ հորդորը և առանձին հանդիպումների ժամանակ ևս, որ եկել է ժամանակը, որ այն մարդիկ, ովքեր կարողացել են իրենց հնարավորինս ազնիվ պահել, այսպես ասած, համեմատաբար մաքուր մնալ, իմանան իրենց գինը և արժեքը, իրենք իրավունք չունեն մսխել ազատամարտիկի իմիջը, որն այսօր այդքան անհրաժեշտ է ժողովրդի համար: Ժողովուրդը կգնա միայն և միայն հնարավորինս մաքուր, ազնիվ մարդկանց խմբի ետևից: Այնտեղ կան մի քանի մարդիկ, ում պետք է փորձեմ փրկել այդ ճահճից»,- ասաց Ժիրայր Սէֆիլյանը:
