Մոսկվան և Բաքուն պետք է համաձայնեցված դիրքորոշումներ մշակեն տնտեսական հարցերի շուրջ. Դմիտրի Մեդվեդև
Ադրբեջանական Trend լրատվական գործակալության փոխանցմամբ՝ Ռուսաստանի վարչապետ Դմիտրի Մեդվեդևը կարծում է, որ Մոսկվան և Բաքուն պետք է մշակեն համաձայնեցված դիրքորոշումներ տնտեսական հարցերի, այդ թվում նաև էներգետիկ ոլորտի շուրջ.
«Մենք գործընկերներ ենք և մեր համագործակցությունը զարգացնում ենք բոլոր հնարավորություններով: Այդպես եղել է, այդպես կա և կարծում եմ, որ կլինի: Դա արտացոլվում է մեր համագործակցության գործնականում բոլոր ասպեկտներում:
Ռուսաստանն ու Ադրբեջանն ունեն համագործակցության առաջնահերթություններ՝ ներառյալ էներգետիկան: Ադրբեջանը նոււնպես էներգետիկ խոշոր խաղացող է, և ինձ թվում է, որ մեզ համար շատ կարևոր է մի ամբողջ շարք հարցերի շուրջ համաձայնեցված դիրքորոշումներ մշակելը:
Կողմերն ինչ-որ պահերի կլինեն մրցակիցներ, ինչը, ելնելով միջազգային պրակտիկայից, նորմալ է: Սակայն ես կարծում եմ, որ մենք կկարողանանք պայմանավորվել: Ամեն դեպքում Ռուսաստանի կառավարությունն անելու է իրենից կախված ամեն ինչ: Հուսով եմ, որ Ադրբեջանի ղեկավարությունը կվարվի նույն կերպ»:
