Ամերիկացի համանախագահը մեկնեց Ղարաբաղ
Միացյալ Նահանգներից ԵԱՀԿ-ի Մինսկի խմբի նորանշանակ համանախագահ Ջեյմս Ուորլիքը այսօր ուղևորվել է Լեռնային Ղարաբաղ, որտեղ, Հայաստանում ԱՄՆ-ի դեսպանատան հաղորդագրության համաձայն, կշարունակի իր հանդիպումները և տեղում կծանոթանա առաջին գծի իրավիճակին: Այս մասին հաղորդում է «Ազատություն» ռադիոկայանը:
Սեպտեմբերի 10-12-ը Երևան կատարած այցի ժամանակ, ինչպես նշված է հաղորդագրությունում, դեսպան Ուորլիքը քննարկել է խաղաղության գործընթացը Հայաստանի նախագահ Սերժ Սարգսյանի և արտգործնախարար Էդվարդ Նալբանդյանի հետ և անվտանգության հետ կապված իրավիճակը՝ պաշտպանության նախարար Սեյրան Օհանյանի հետ: «Նա վերահաստատեց Միացյալ Նահանգների ցանկությունը օգնել կողմերին Լեռնային Ղարաբաղի հակամարտության խաղաղ կարգավորման հարցում և պատրաստակամությունը աշխատել Ռուսաստանյան Դաշնության ու Ֆրանսիայի հետ՝ որպես ԵԱՀԿ-ի Մինսկի խմբի համանախագահների», – փոխանցել է Հայաստանում Միացյալ Նահանգների դեսպանատունը:
