Մորն ու տատիկին խոշտանգելու գործով դատական նիստը հետաձգվեց
Որդու և հարսի կողմից մորն ու տատիկին խոշտանգելու գործով այսօրվա դատական նիստը տեղի չունեցավ ամբաստանյալ Սյուզաննա Գրիգորյանի պաշտպան Էդուարդ Աղաջանյանի բացակայության պատճառով: Ըստ «Փաստինֆոյի»՝ Երևանի Էրեբունի և Նուբարաշեն վարչական շրջանների ընդհանուր իրավասության դատարանին՝ դատավոր Վարդան Գրիգորյանի նախագահությամբ, հղած գրության մեջ պաշտպանը տեղեկացրել է, որ Հատուկ քննչական ծառայության կողմից անհետաձգելի քննչական գործողությանը մասնակցելու պատճառով չի կարող ներկայանալ դատարան և խնդրել դատական նիստը հետաձգել:
Օգոստոսի 12-ի դատական նիստում ճառերով հանդես կգա տուժող կողմը: Նախորդ դատական նիստում ճառով հանդես էր եկել մեղադրող Արիս Բարսեղյանը, ով միջնորդել էր ամբաստանյալ Գուրգեն Գրիգորյանին դատապարտել 6 տարվա ազատազրկման, իսկ նրա կնոջը՝ ամբաստանյալ Սյուզաննա Գրիգորյանին՝ 4 տարվա պայմանական ազատազրկման՝ 2 տարվա փորձաշրջանով: Ըստ մեղադրանքի` Գուրգեն Գրիգորյանը իր կնոջ` Սյուզաննա Գրիգորյանի հետ, տան հետ կապված և կենցաղային հարցերով 01.02.2012թ. մինչև 11.06.2012թ. ընկած ժամանակահատվածում ուժեղ ցավ, մարմնական և հոգեկան տառապանքներ պատճառելով, խոշտանգել են Գ.Գրիգորյանից նյութական և այլ հարազատական կախվածության մեջ գտնվող վերջինիս մորը` Թագուհի Գրիգորյանին,և տատիկին` Նազիկ Կարապետյանին: Գրիգորյանը պարբերաբար վիճել է մոր հետ, հայհոյանքներ տվել, ծեծի ենթարկել և թքել մոր վրա: Նրա նկատմամբ որպես խափանման միջոց է ընտրվել կալանավորումը, իսկ Սյուզաննա Գրիգորյանի նկատմամբ` չհեռանալու մասին ստորագրությունը:
