ԱՄՆ պետդեպարտամենտը դատապարտել է Սոմալիում Թուրքիայի դեսպանատան շենքի վրա կատարված հարձակումը
ԱՄՆ Պետդեպարտամենտի պաշտոնական կայքի փոխանցմամբ՝ ԱՄՆ-ը կտրականապես դատապարտել է Սոմալիում թուրքական դիվանագիտական նստավայրի վրա իրականացված ահաբեկչական հարձակումը: Այս մասին երեկ հայտարարել է ԱՄՆ պետդեպարտամենտի ներկայացուցիչ Ջեն Պսակին:
Վերջինիս խոսքերով՝ ԱՄՆ-ը ցավակցում է զոհվածների ընտանիքներին և շուտափույթ առողջացում է մաղթել վիրավորներին. «Թուրքիան կարևոր դեր է խաղում Սոմալիին օգնելու հարցում այդ երկրում երկու տասնամյակ ընթացող հակամարտություններից հետո:
ԱՄՆ-ը գտնվելու է Սոմալիի ժողովրդի, Թուրքիայի և միջազգային հանրության բոլոր անդամների կողքին, որոնք ծառայում են Սոմալիում խաղաղության ու կայունության հաստատմանը»:
Նշվում է, որ Սոմալիի մայրաքաղաք Մոգադիշոյում պայթուցիկով լի ավտոմեքենան երեկ մխրճվել է Թուրքիայի դեսպանատան շենքի դարպասների մեջ և պայթել: Թուրքիայի ԱԳՆ-ը դատապարտել էր այդ հարձակումը:
