ԵՄ-ի Խորհուրդն ահաբեկչական կազմակերպությունների թվում ներառեց «Հզբոլլահի» ռազմական թևը
Ռուսական РИА Новости լրատվական գործակալության փոխանցմամբ՝ ԵՄ-ի Խորհուրդն այսօր ահաբեկչական կազմակերպությունների թվում է ներառել լիբանանյան «Հզբոլլահ» շարժման ռազմական թևը, որը Սիրիայում հանդես է գալիս իշխող վարչակարգի կողմից:
Այս մասին հայտարարել է ԵՄ-ի Խորրդի մամլո ծառայության ներկայացուցիչը: Վերջինիս խոսքերով՝ որոշումն ուժի մեջ կմտնի վաղը՝ ԵՄ-ի Պաշտոնական տեղեկագրում հրապարակվելուց հետո:
ԵՄ-ի անդամ երկրների արտգործնախարարները «Հզբոլլահի» ռազմական թևն ահաբեկչական կազմակերպությունների թվում ներառելու մասին որոշումն ընդունել էին հուլիսի 22-ին, Բրյուսելում:
Նախորդ տարվա հուլիսի 18-ին Բուլղարիայի Բուրգաս քաղաքի օդանավակայանում մահապարտ ահաբեկչի իրականացրած հարձակման հետևանքով զոհվել էր 5 իսրայելցի և բուլղարացի մեկ վարորդ: Սոֆիան այդ ահաբեկչության մեջ մեղադրել էր «Հզբոլլահին»:
Հիշեցնենք, որ Իսրայելը դժգոհ էր մնացել «Հզբոլլահի» միայն ռազմական թևն ահաբեկչական կազմակերպությունների թվում ներառելուց:
