Արցախից հայտնում են
ԼՂՀ ԿԱ փրկարար ծառայության տեղեկատվության և հասարակայնության հետ կապերի բաժնից հայտնում են Արցախի տարածքում շաբաթվա ընթացքում գրանցված արտակարգ պատահարների մասին։
Մեքենան շրջվել է
Հուլիսի 19-ին տեղեկություն է ստացվել, որ Մարտակերտի շրջանի Առաջաձոր -Հովտաշեն ճանապարհին տեղի է ունեցել ՃՏՊ: Պարզվել է, որ Հովտաշեն համայնքի բնակիչ, 1953 թ. ծնված Կ. Սեյրանյանի վարած «Աուդի» մակնիշի ավտոմեքենան շրջվել է, որի հետևանքով վերջինս և ուղևորներ` 1962 թ. ծնված Ս. Պողոսյանը, 2007 թ. ծնված Ժ.Սեյրանյանը, 1987 թ. Մ. Սիմոնյանը ստացել են տարբեր մարմնական վնասվածքներ:
Հրշեջ-փրկարարները տուժածներին տեղավորել են դեպքի վայր ժամանած շտապօգնության մեքենայում, որով էլ վերջիններիս տեղափոխել են Հանրապետական հիվանդանոց: Ճանապարհին վարորդ Կ. Սեյրանյանը մահացել է:
Ըստ բժիշկների` մնացած տուժածների առողջական վիճակը բավարար է:
Զենք-զինամթերքի հայտնաբերում
Հուլիսի 23-ին տեղեկություն է ստացվել, որ Ասկերանի շրջանի Ծաղկաշատ համայնքի բնակիչ Կ. Սողոմոնյանը համայնքի տարածքում զինամթերք է հայտնաբերել: Դեպքի վայր մեկնած ՓԾ ինժեներասակրավորական խումբը վնասազերծել է հայտնաբերված զինամթերքը (2 միավոր գնդիկաբեկորային ավիառումբ):
