Թուրքիայում կարող են կրկնվել «Գեզի» այգու իրադարձությունները. Էգեմեն Բաղըշ
Թուրքական Anadolu լրատվական գործակալության փոխանցմամբ՝ Թուրքիայի՝ Եվրամիության հարցերով պետնախարար և ԵՄ-ին Թուրքիայի լիիրավ անդամակցության գծով գլխավոր բանագնաց Էգեմեն Բաղըշը հայտարարել է, որ Թուրքիայում կարող են կրկնվել «Գեզի» այգու իրադարձությունները.
«Մենք պետք է պահպանենք զգոնություն, քանի որ անկարգություններ հրահրողները կփորձեն ռևանշ վերցնել: Նրանք հասկանում են, որ պարտություն են կրել առաջին փուլում և կփորձեն ռևանշ վերցնել:
Պետք է զգոնություն պահպանել սադրանքների հնարավոր կրկնվելու դեպքում: Թուրքիայում կան ուժեր, որոնց անհանգստացնում է երկրի ու ժողովրդավարության զարգացումը: Դրա համար էլ «Գեզի» այգու շուրջ իրադարություններն ուղղվեցին Թուրքիայի բարգավաճման խոչընդոտմանը»:
Բաղըշի խոսքերով՝ երկրի զարգացման ճանապարհին ընկած գլխավոր խոչընդոտը հանդիսացել է «Քրդստանի աշխատավորական» կուսակցության (PKK) գործունեությունը, որը Թուրքիային պատճառել է 350 միլիարդ դոլարի վնաս:
Հիշեցնենք, որ օրեր առաջ Ստամբուլի տարածաշրջանային վարչական դատարանն արտոնել է «Գեզի» այգում շինարարական աշխատանքներ իրականացնելը:
