Պենտագոնը տերմինատորներ է նախագծում (լուսանկարներ, տեսանյութ)
Ջեյմս Քեմերոնի ֆիլմերում ներկայացված ապոկալիպիկ ապագան, ինչպես երևում է, կարող է իրականություն դառնալ։ Պենտագոնի DARPA ստորաբաժանումը (Defense Advanced Research Projects Agency, պաշտպանության ոլորտի առաջատար հետազոտական նախագծերի գործակալություն) ակտիվորեն զբաղվում է մարդանման ATLAS ռոբոտների նախագծման աշխատանքներով։
Ռոբոտը արտաքուստ մարդու նման է։ Ունի երկու ոտք և երկու ձեռք-մանիպուլյատոր։ Հասակը 187սմ է, քաշը՝ մոտավորապես 150կգ։ Նախագծողների խոսքերով՝ ռոբոտն օգտագործվելու է փրկարարական տարբեր գործողություններում, որտեղ մարդու մասնակցությունն անհնար է կամ վտանգավոր։
Արդեն այս պահի դրությամբ ATLAS-ը տպավորում է իր ֆունցիոնալ հնարավորություններով։ Այն կարողանում է հաղթահարել տարբեր արգելքներ, պահել հավասարակշռությունը հարվածի ժամանակ և ինքնուրույն կանգնել։
Ռոբոտը չի կրակում, սակայն չի բացառվում, որ նախագծողները ATLAS-ի ոչ բոլոր հնարավորություններն են ցուցադրել տեսանյութում։
