Հասան Ռոուհանին չի բացառել ընդդիմադիր առաջնորդներին ազատ արձակելու հնարավորությունը
Իրանական Mehr լրատվական գործակալության փոխանցմամբ՝ Իրանի նորընտիր նախագահ Հասան Ռոուհանին չի բացառել ընդդիմադիր առաջնորդների ազատ արձակումը և նրանց ձերբակալման հետ կապված թյուրիմացությունների հարթումը:
Նա ընդգծել է, որ իրենք պետք է ճանապարհ հարթեն նրանց համար, ովքեր պատրաստ են հրաժարվել անցյալի սխալներից: Ռոուհանին, սակայն, կոնկրետ անուններ չի տվել:
Հունիսի 14-ին Իրանում անցկացված նախագահական ընտրություններում հաղթանակ տանելուց հետո իրանական մի շարք քաղաքական ուժեր և գործիչներ Ռոուհանիին կոչ էին արել միջոցներ ձեռնարկել մի շարք քաղբանտարկյալներին ազատ արձակելու ուղղությամբ:
Դա մասնավորապես վերաբերում է 2009 թվականին Իրանում անցկացված նախագահական ընտրությունների արդյունքները բողոքարկած ընդդիմադիր առաջնորդ Միր Հոսեին Մուսավիի և Մեհդի Կարուբիին: Նրանք երկուսն էլ գտնվում են տնային կալանքի տակ:
