2012թ. շարունակել է աճել ժողովրդավարության ոլորտում Ադրբեջանի և նրա հարևանների միջև տարբերությունը. Freedom House
Freedom House միջազգային իրավապաշտպան կազմակերպությունը հրապարակել է «Անցումային շրջանի երկրներ-2013» («Nations in Transit 2013») տարեկան զեկույցը, որտեղ խոսք է գնում Կենտրոնական Եվրոպայից դեպի Եվրասիա ընկած տարածաշրջանի 29 երկրներում մարդու իրավունքների ու ժողովրդավարության խնդիրների մասին:
Զեկույցում անդրադարձ է կատարվել 2012 թվականի հունվարի 1-ից մինչև դեկտեմբերի 31-ն ընկած ժամանակահատվածում տվյալ երկրների ընտրական գործընթացներին, քաղաքացիական հասարակությանը, մամուլի անկախությանը, ազգային ժողովրդավարական կառավարմանը, տեղական ժողովրդավարական կառավարմանը, դատական համակարգի անկախությանը և կոռուպցիայի մակարդակին:
Զեկույցում նշված է, որ 2012 թվականին շարունակվել է աճել մարդու իրավունքների ու ժողովրդավարության ոլորտում Ադրբեջանի և նրա կովկասյան հարևանների (Հայաստանի ու Վրաստանի) միջև տարբերությունը:
Զեկույցում նշված է, որ 2012 թվականին Հայաստանում ու Վրաստանում անցկացվել են խաղաղ և առավել ընդգրկուն ընտրություններ, ուշադրություն է հրավիրվել նրան, որ Հայաստանի Ազգային Կոնգրեսը (ՀԱԿ) առաջին անգամ մուտք է գործել խորհրդարան և սկսել իր խորհրդարանական գործունեությունը:
Մինչդեռ Ադրբեջանում բռնություններ են գործադրվել «Եվրատեսիլ» երաժշտական մրցույթի նախօրեին անցկացված բողոքի ակցիաների մասնակիցների նկատմամբ, ինչպես նաև խոշոր տուգանքներ են սահմանվել չարտոնյալ հանրահավաքների մասնակցության համար:
Միևնույն ժամանակ արտասահմանյան մամուլը քանիցս գրել է Ադրբեջանի նախագահ Իլհամ Ալիևի ընտանիքի արտասահմանյան վիթխարի ակտիվների մասին, ինչը հանգեցրեց նրան, որ Ադրբեջանում մեծապես սահմանափակվեցին կոռուպցիոն դեպքերի մասին տեղեկատվությունը գտնելու լրագրողների հնարավորությունները:
Զեկույցում անդրադարձ է կատարված նաև Հունգարիայի կողմից Ադրբեջանին տխրահռչակ Ռամիլ Սաֆարովին արտահանձնելուն: Նշված է, որ 2004 թվականին Բուդապեշտում հայ սպային սպանած Սաֆարովին Ադրբեջանում անմիջապես ազատ են արձաել և հերոսացրել, ինչը պատճառ դարձավ Ղարաբաղյան բանակցային գործընթացում որևէ առաջընթացի գրանցման բացակայության:
