Արվեստի հսկաները ժամանեցին Հայաստան (լուսանկարներ)

«Ոսկե ծիրան» Երևանի 10-րդ միջազգային կինոփառատոնի ֆիլմերի ծրագիրը կպահպանի չորս մրցույթները: Մրցույթում ընդգրկված ֆիլմերը կներկայացվեն համապատասխանաբար՝ Խաղարկային, Վավերագրական, «Հայկական համայնապատկեր» և «Կորիզ» (կարճամետրաժ ֆիլմերի) անվանակարգերում: Փառատոնի բացումը տեղի կունենա հուլիսի 7-ին:

Նույն օրը մի քանի իրադարձություններ տեղի կունենան. ավանդույթ դարձած Ծիրանօրհնեքի արարողակարգը՝ բացումից ժամեր առաջ՝ ժամը 14:00-ին, Սուրբ Զորավոր Աստվածածին եկեղեցում: Նույն օրը, ժամը 18:00-ին Շառլ Ազնավուրի անվան հրապարակում տեղի կունենա աշխարհահռչակ շանսոնյե, կինոդերասան Շառլ Ազնավուրի աստղի բացման արարողությունը, որին անձամբ ներկա կլինի Ազնավուրը, ով քիչ առաջ իրեն ուղեկցող պատվիրակության և ընտանիքի անդամների հետ ժամանեց Հայաստան: Նրան «Զվարթնոց» օդանավակայանում դիմավորեցին ՀՀ Արտաքին գործերի նախարար Էդվարդ Նալբանդյանը և Հայաստանում Ֆրանսիայի դեսպան Անրի Ռենոն:

Հիշեցնենք, որ «Ոսկե ծիրան» կինոփառատոնի նախաձեռնությամբ նույն հրապարակում՝ «Մոսկվա» կինոթատրոնի մոտ, նախորդ տարիներին տեղադրվել են նաև հայկական կինոյի մեծ վարպետներ Համո Բեկնազարյանի, Սերգեյ Փարաջանովի, Անրի Վերնոյի (Աշոտ Մալաքյան) և Ռուբեն Մամուլյանի աստղերը:

Փառատոնի բացման համար ընտրվել է Ֆրանսուա Տրյուֆոյի «Կրակե´ք դաշնակահարի վրա» ֆիլմը (1960թ.)՝ Շառլ Ազնավուրի գլխավոր դերակատարմամբ:

Փառատոնի պաշտոնական բացման արարողությունը տեղի կունենա Ալ. Սպենդիարյանի անվան օպերայի և բալետի ազգային ակադեմիական թատրոնում: Այդ ընթացքում Շառլ Ազնավուրին կշնորհվի նաև «Փարաջանովյան թալեր» մրցանակը: Ի՞նչ է դա: 1976 թվականին, երբ սովետական իշխանությունը ձերբակալել էր Սերգեյ Փարաջանովին, բանտախցում շշերի կափարիչների վրա նա եղունգով դրամներ էր փորագրել՝ դրանք անվանելով «Թալերներ»: Այդ թալերները Փարաջանովի երևանյան թանգարանում են գտնվում: «Ոսկե ծիրան» կինոփառատոնն այդ դրամներից մեկի արծաթյա պատճենով հատուկ մրցանակներ է շնորհում կինոյի պատմության մեջ իրենց մեծ ավանդն ունեցող կինոգործիչներին: Նշենք, որ այս տարի «Փարաջանովյան թալերներ» կշնորհվեն նաև Մարգարեթ ֆոն Թրոթային, Իշտվան Սաբոյին, Յոս Ստելինգին և Ներսես Հովհաննիսյանին:

«Ոսկե ծիրան» կինոփառատոնի շրջանակներում նախատեսվում է նաև Շառլ Ազնավուրի դերակատարմամբ նկարահանված ֆիլմերի հետահայաց ցուցադրությունը: Կցուցադրվեն նաև կանադահայ Ատոմ Էգոյանի «Արարատ» (2002թ.) և ֆրանսիացի կինոռեժիսոր Դընի դը Լա Պատելյերի՝ հայ հանդիսատեսին ոչ այնքան հայտնի «Թոբրուկ գնացող տաքսին» (1961թ.) ֆիլմերը:

Փառատոնի շրջանակներում այսօր Հայաստան է ժամանել նաև աշխարհահռչակ կինոռեժիսոր Արտավազդ Փելեշյանը, որին ուղեկցում էին կինը և երկու թոռնուհիները: «Ոսկե ծիրանի» ծրագրերի շրջանակներում հարգանքի տուրք կմատուցվի մեծանուն կինոռեժիսորին:

Հուլիսի 12-ին, ժամը 14:00-ին Մայր Աթոռ Սուրբ Էջմիածնում տեղի կունենա Ամենայն Հայոց կաթողիկոս Գարեգին Բ-ի սահմանած «Եղիցի լույս» մրցանակի հանձնումը, որն այս տարի կշնորհվի Արտավազդ Փելեշյանին: «Եղիցի լույս» մրցանակը հանձնվում է համաշխարհային կինեմատոգրաֆիայում ունեցած ավանդի, հոգևոր մշակույթը և համամարդկային արժեքները քարոզելու համար: Մրցանակն անցյալ տարի հանձնվել է նաև ռուս կինոռեժիսոր Ալեքսանդր Սոկուրովին: Արտավազդ Փելեշյանի Հոբելյանական ծրագիրը և նրա ֆիլմերի հետահայաց ցուցադրությունը տեղի կունենա «Մոսկվա» կինոթատրոնի կարմիր դահլիճում հուլիսի 11-ին, ժամը 19:30-ին: Կցուցադրվեն ռեժիսորի «Բնակիչներ» (1972թ.), «Մեր դարը» (1982թ.), «Տարվա եղանակներ» (1975թ.), «Վերջ» (1994թ.), «Կյանք» (1993թ.), «Մարդկանց երկիր» (1966թ.) ֆիլմերը: