Ոչխարի բուրդը պահանջարկ չունի
Հայաստանում կուտակվել է ավելի ան 4000 տոննա ոչխարի բուրդ, որը գյուղացիները չեն կարողանում իրացնել: Հայրենական ապրանք արտադրողների միության նախագահ Վազգեն Սաֆարյանը 168.am-ին հայտնեց, որ աշխատանքներ են տարվում ծրագրեր մշակելու ուղղությամբ, որպեսզի հնարավոր լինի այդ ապրանքը սպառել:
«Հայաստանի գյուղացիական տնտեսություններում բուրդն ամեն տարի ավելանում է, այն պահեստավորում են, քանի որ առայժմ իրացման շուկա չկա»,- ասաց Վ.Սաֆարյանը:
ՀՀ-ում ներկայումս կա մոտ 500-600 հազ. ոչխար: Յուրաքանչյուրից տարեկան ստացվում է շուրջ 2 կգ բուրդ, այսինքն տարեկան առնվազն 1000 տոննայով բրդի պաշարներն ավելանում են:
Ըստ Վ.Սաֆարյանի՝ ուսումնասիրվում է, թե ինչպես կարելի է բուրդն ավելի շատ ծավալներով օգտագործել գորգագործությունում, ներքնակների արտադրությունում և այլուր: Միության նախագահը նշեց, որ դա նաև թույլ կտար ավելացնել աշխատատեղերը:
