Սաակաշվիլիի կուսակցությունը քաղաքական բոյկոտ է հայտարարել խորհրդարանին
Грузия Online-ի փոխանցմամբ՝ Վրաստանի նախագահի «Միասնական ազգային շարժում» կուսակցության խորհրդարանական խմբակցությունն անցում է կատարում քաղաքական բոյկոտի ռեժիմին և դադարեցնում է երկրի օրենսդիր բարձրագույն մարմնում իր աշխատանքը:
Այս մասին խմբակցության անունից հայտարարել է պատգամավոր Լևան Բեժաշվիլին: Վերջինս ընդգծել է, որ իշխանությունների կողմից Թբիլիսիի կուսակցական ենթակառուցվածքը ոչնչացնելու պայմաններում իրենք չեն կարող քննարկել օրենքների ընդունումը.
«Մենք չենք կարող քննարկել սերիալների արգելման մասին օրինագիծը և նման բաները, երբ մեր գործընկերներին ձերբակալում են հնարովի մեղադրանքներով: Կուսակցության հետագա պլանների մասին կհայտարարվի ավելի ուշ»:
Հիշեցնենք, որ երեկ ձերբակալվել է Թբիլիսիի քաղաքապետարանի մոտ 30 աշխատակից, որոնց մեծ մասը դրանից հետո բողոք է ներկայացրել Գլխավոր դատախազություն:
