Հայեցակարգ՝ գույքահարկի հարկման համակարգի արդյունավետության բարձրացման համար
Գույքային հարկերը, որպես կանոն, համարվում են բավականին տեսանելի հարկեր. դրանք չեն պահվում աղբյուրի մոտ, ինչպես եկամտահարկը, անմիջականորեն վճարվում են բնակչության գրպանից, դրանք հիմնականում ուղղվում են տեղական բյուջեներ, ֆինանսավորում են այնպիսի ծառայություններ, որոնց որակը և մակարդակը նույնպես տեսանելի է հարկատուներին: Վերջին 10 տարիների ընթացքում գույքահարկի և հողի հարկի գծով մուտքերը Հայաստանի համայնքների ընդհանուր եկամուտներում կազմել են միջինը շուրջ 24 %, ընդ որում` 2010-2011 թթ-ին այդ ցուցանիշը գնալով նվազել է: Այսպես՝ 2009թ-ին գույքահարկն ու հողի հարկն ընդամենը եկամուտների 28.3%-ն են կազմել, իսկ 2010-ին՝ 18.5%, 2011-ին՝ 13.5%:
Գույքահարկի հարկման համակարգի արդյունավետության բարձրացման նպատակով ՀՀ կառավարությունը մշակել է և առաջիկա՝ հունիսի 27-ի նիստում կներկայացնի «Գույքահարկի հարկման համակարգի արդյունավետության բարձրացման ուղիները» հայեցակարգը:
Ըստ փաստաթղթի՝ նախատեսվում է ընդլայնել գույքահարկով հարկման օբյեկտները, դրանցում ներառել նաև պետական և համայնքային գույքը, բարձր արժեք ունեցող գույքի համար սահմանել ավելի բարձր պրոգրեսիվ դրույքաչափեր, այսինքն` գույքի արժեքի աճին զուգընթաց սահմանել աճողական ավելի բարձր դրույքաչափեր,
բարձրացնել գույքի օգտագործման արդյունավետությունը` ապահովելով ռեսուրսների և գույքի արդյունավետ այլընտրանքային օգտագործում, ստեղծել հանրապետության տարածքում անշարժ գույքի (հողի և շենքերի, շինությունների) ռեսուրսների վերաբերյալ ճշգրիտ տեղեկատվական բազա, ինչը հնարավորություն կընձեռի բարձրացնել հարկման արդարացիությունը, վերանայել հարկային արտոնությունների համակարգը` վերացնելով հողի և շինությունների մասով ներկայումս առկա արտոնությունների տարբեր շրջանակները և այլն:
