Թուրքիայում օտարերկրյա դիվանագետների կանայք կարմիր զգեստ են կրել` ի աջակցություն ցուցարարների
Թուրքական Hürriyet թերթի փոխանցմամբ` Թուրքիայում գտնվող օտար մի շարք դիվանագետների կանայք ու կին դիվանագետներ հանդես են եկել բողոքի ակցիաների մասնակիցներին աջակցելու օգտին:
Մեծ Բրիտանիայի դեսպանատանը կազմակերպվող տարեկան ընդունելության ժամանակ նրանք` որպես ցուցարարների հետ իրենց համերաշխության նշան, հագել են կարմիր գույնի զգեստներ: Նրանք հայտարարել են, որ ցանկացել են նման կերպ իրենց աջակցությունը հայտնել բողոքի ակցաների մասնակիցներին:
Դիվանագետներն հավաքվել են բրիտանական դիվանագիտական առաքելության շենքի առջև և խմբով լուսանկարվել: Թերթն ընդգծում է, որ կարմիր գույնը դարձել է Թուրքիայում բողոքի շարժման յուրօրինակ խորհրդանիշ:
Դիվանագետների այդ ակցիան անցկացվել է համաշխարհային ԶԼՄ-ներում թուրք աղջկա այն լուսանկարից հետո, որում պատկերված է ոստիկանության կողմից նրա դեմ արցունքաբեր գազի կիրառումը: Աղջկա հագին եղել է կարմիր գույնի զգեստ:
