Հենրիխ Մխիթարյանը Լիվերպուլ կժամանի այսօր. «Daily Mirror»
Լիվերպուլը հաղթեց Հենրիխ Մխիթարյանի համար Յուվենտուսի և ՊՍԺ-ի հետ պայքարում: Այս մասին հայտնում է բրիտանական «Daily Mirror» պարբերականը, ըստ որի` հայազգի ֆուտբոլիստի տեղափոխությունը անգլիական ակումբ կարժենա 23 միլիոն ֆունտ ստերլինգ:
Հետաքրքիր է, որ, ըստ «Daily Mirror»-ի, Հենրիխ Մխիթարյանը Բիթլզի հայրենի քաղաք կժամանի արդեն այսօր` հունիսի 18-ին, իսկ թիմի գլխավոր մարզիչ Բրենդան Ռոջերսը ակնկալում է Մխիթարյանի տրանսֆերային գործարքն իրականացնել մինչև շաբաթվա վերջը:
«Այդ գործարքը Ռոջերսը մասամբ կփոխհատուցի` Էնդի Քերոլին 15 մլն ֆունտ ստերլինգով Վեսթ Հեմ ակումբին վաճառելու միջոցով»,- ավելացնում է բրիտանական թերթը:
Հիշեցնենք, որ Հայաստանի ֆուտբոլի ազգային հավաքականի անդամ և ուկրաինական «Շախտյոր» ակումբի կիսապաշտպան Հենրիխ Մխիթարյանի` անգլիական Լիվերպուլ ակումբ տեղափոխվելու վերաբերյալ լուրերը հատկապես ակտիվացել էին վերջին ամիսներին:
