Ֆրանսիայում տեղի է ունեցել միասեռ զույգերի առաջին օրինական ամուսնությունը
Ռուսական РИА Новости լրատվական գործակալության փոխանցմամբ՝ չորեքշաբթի Ֆրանսիայում վրա է հասել նոր ժամանակաշրջան. երկրի հարավում գտնվող Մարսել քաղաքում տեղի է ունեցել երկրի պատմության մեջ միասեռ զույգերի առաջին օրինական ամուսնությունը:
Խոսքը գնում է 40-ամյա Վենսան Օտենի և նրա գործընկեր, 30-ամյա պետծառայող Բրունո Բուալոյի մասին: Նրանք ծանոթացել են 2006 թվականին, ինտերնետային ֆորումներից մեկում, ուր հավաքվել են երգիչ Քրիստոֆ Վիլլեմի երկրպագուները:
Նշվում է, որ երկար սպասված ամուսնական արարողության ժամանակ նրանք չեն թաքցրել միմյանց նկատմամբ տածած զգացմունքները, բռնել են միմյանց ձեռք, գրկախառնվել են և փոխանակվել են համբույրներով:
Հիշեցնենք, որ այս տարվա մայիսի 18-ին Ֆրանսիան դարձավ միասեռ ամուսնությունները և միասեռականների կողմից երեխաների որդեգրումն օրինականացրած 14-րդ երկիրն աշխարհում: Դա Ֆրանսիայի նախագահ Ֆրանսուա Օլանդի նախընտրական խոստումներից մեկն էր:
