Թուրքիայի զինված ուժերը շուտով կհամալրվեն հայրենական արտադրության առաջին ուղղաթիռով
Թուրքական Anadolu լրատվական գործակալության փոխանցմամբ՝ Թուրքիայի զինված ուժերը շուտով կստանան հայրենական արտադրության առաջին՝ ATAK, ուղղաթիռը: Այս մասին այսօր հայտարարել է Թուրքիայի պաշտպանական արդյունաբերության խորհրդական Մուրաթ Բայարը:
Վերջինիս խոսքերով՝ ATAK ուղղաթիռի ստեղծման աշխատանքները գտնվում են ավարտական փուլում. «Այսօր Թուրքիայի պաշտպանական արտադրանքի արտադրությունը գտնվում է բավական լավ մակարդակի վրա:
Թուրքիան պաշտպանական արդյունաբերության արտադրանք է արտահանում այնպիսի երկրներ, ինչպիսիք են Կատարը, Պակիստանը, Մալայզիան, Եգիպտոսը, Վրաստանը և Թուրքմենստանը»:
Հիշեցնենք, որ փետրվարի սկզբին հաղորդվում էր, թե Ադրբեջանը Թուրքիայից գնելու է 60 հատ T-129 ATAK ուղղաթիռ, ինչի համար վճարելու է 3 միլիարդ դոլար: Սակայն քիչ անց այդ տեղեկատվությունը հերքվեց:
