Իրանի նախագահական ընտրությունների ժամանակ խստացվելու է ԶԼՄ-ների նկատմամբ դիտարկումը
Իրանական Fars լրատվական գործակալության փոխանցմամբ՝ Իրանում կայանալիք առաջիկա նախագահական ընտրությունների ժամանակ խստացվելու է ԶԼՄ-ների նկատմամբ մոնիթորինգը: Այս մասին հայտարարել է Իսլամական կողմնորոշման, մակույթի, տպագրության ու տեղեկատվության փոխնախարար Մոհամմադ Ջաֆար Մոհամադզադեն:
Վերջինիս խոսքերով՝ իրենց նախարարությունն ընտրությունների ժամանակ աշխատելու է տեղական ԶԼՄ-ների հետ: Նա ընդգծել է, որ մոնիթորինգն անցկացվելու է երկու ուղղությամբ՝ նյութերի որակի մոնիթորինգ, ինչպես նաև օրենքներին ու կանոններին համապատասխան ԶԼՄ-ների մոնիթորինգ:
Փոխնախարարը հավելել է, որ մոնիթորինգը տևելու է երկու ամիս՝ մայիս-հունիս ամիսներին՝ ԶԼՄ-ներին կոչ անելով ակտիվություն ցուցաբերել՝ ընտրություններին ավելի շատ մարդ մասնակցելու համար: Իրանում նախագահական ընտրությունները տեղի են ունենալու հունիսի 14-ին:
