ԵԱՀԿ Մինսկի խմբի համանախագահներն առաջիկա շաբաթներին կժամանեն տարածաշրջան
Ադրբեջանական Trend լրատվական գործակալության փոխանցմամբ՝ ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ժակ Ֆորը (Ֆրանսիա) և Յան Կելին (ԱՄՆ) տարածաշրջան կայցելեն առաջիկա շաբաթներին՝ Հայաստանի ու Ադրբեջանի ղեկավարության հետ քննարկելու համար Ղարաբաղյան հակամարտության խաղաղ կարգավորման ուղղությամբ հետագա քայլերը:
Այս մասին այսօր հայտարարել է ԵԱՀԿ-ին կից ԱՄՆ առաքելությունը: Դրանում նշված է, որ ԵԱՀԿ Մինսկի խմբի համանախագահներն ու ԵԱՀԿ գործող նախագահի անձնական ներկայացուցիչ Անջեյ Կասպրշչիկը մարտի 2-ին հանդիպել են Ադրբեջանի արտգործնախարար Էլմար Մամեդյարովի, իսկ մարտի 3-ին՝ Հայաստանի արտգործնախարար Էդվարդ Նալբանդյանի հետ և քննարկել են Լեռնային Ղարաբաղի շուրջ խաղաղության գործընթացը:
ԵԱՀԿ Մինսկի խմբի համանախագհները նաև իրենց մտահոգությունն են հայտնել Լեռնային Ղարաբաղում հնարավոր քաղաքացիական թռիչքների իրականացնելու և ոչ վաղ անցյալում շփման գծում գրանցված միջադեպերի վերաբերյալ: Նրանք նաև քննարկել են հրադադարի ռեժիմի ամրագրման հարցը:
