Վրաստանի ԱԳՆ-ը տարածել է Փանջիկիձեի հայտարարության տեսագրությունը
Новости-Грузия-ի փոխանցմամբ՝ Վրաստանի ԱԳՆ-ն այսօր Facebook սոցցանցում տարածել է հունվարի 10-ին Լիտվայում արտգործնախարար Մայա Փանջիկիձեի ելույթը, որի ժամանակ նա հայտարարություն է անում՝ կապված Ադրբեջանի տարածքային ամբողջականության հետ:
Սրանից առաջ ադրբեջանական մամուլը հայտնել էր, թե Փանջիկիձեն իբր հայտարարելէ, որ «Ղարաբաղյան հակամարտության կարգավորումը հնարավոր է միայն Ադրբեջանի տարածքային ամբողջականության շրջանակներում»: Վրացական հեռուստաալիքներն էլ ենթադրել էին, որ դա կարող է Վրաստանի վարչապետ Բիձինա Իվանիշվիլիի հայաստանյան այցի տապալման պատճառ դառնալ, որը պետք է տեղի ունենա հունվարի 17-ին:
Տեսագրության համաձայն Փանջիկիձեն ընդհանուր առմամբ աջակցություն է հայտնում Ադրբեջանի տարածքային ամբողջականությանը, սակայն նա որևէ հիշատակում չի կատարում Լեռնային Ղարաբաղի վերաբերյալ: Փանջիկիձեն մատնանշել է տարածաշրջանի հակամարտություններից յուրաքանչյուրի եզակիությունը:
