Կհրապարակվի Վարդգես Գասպարիի դեմ գործով դատավճիռը
Հոկտեմբերի 29-ին Երևանի Կենտրոն և Նորք-Մարաշ վարչական շրջանների դատարանը՝ դատավոր Մխիթար Պապոյանի նախագահությամբ, կհրապարակի Հայ ազգային կոնգրեսի ակտիվիստ Վարդգես Գասպարիի դեմ գործով դատավճիռը: Այս մաին տեղեկացնում է «Փաստինֆոն»:
Ըստ մեղադրական եզրակացության՝ Վարդգես Գասպարին 2011թ. հոկտեմբերի 20-ին՝ ժամը 12.00-ի սահմաններում, ՀՀ Կառավարության թիվ 1 շենքի մոտակայքում դիտավորությամբ կոպիտ կերպով խախտել է հասարակական կարգը, ինչն արտահայտվել է հասարակության նկատմամբ բացահայտ անհարգալից վերաբերմունք դրսևորելով: Ըստ մեղադրանքի, շուրջ 15 րոպե տևողությամբ աղմկել է և հայհոյել, իր այդ դիտավորյալ գործողություններով խանգարել անցորդների և ներկաների հանգիստը:
Այսօր իր վերջին խոսքում ամբաստանյալը հայտարարեց, որ իր դեմ խուլիգանության հատկանիշներով հարուցված գործը դուրս է իրավական հարթությունից: Ըստ նրա, «Բանակն իրականում» քաղաքացիական նախաձեռնության խաղաղ ցույցի մասնակիցներն, այդ թվում՝ ինքը, ընդամենը հակազդել են քաղաքացիական հասարակության իրավունքների ոտնահարմանը: Ավելին, ըստ ՀԱԿ ակտիվիստի, այդ ՀՀ ոստիկանապետ Ալիկ Սարգսյանն է անհարգալից վերաբերմունք դրսևորել քաղաքացիական հասարակության հանդեպ, և մասնակի դիմադրության հանդիպելով՝ հանձնարարել է ոստիկանություն բերման ենթարկել իրեն:
Մեղադրողը՝ Երևանի Կենտրոն և Նորք-Մարաշ վարչական շրջանների դատախազի տեղակալ Արմեն Աֆանդյանը, իր մեղադրական ճառում միջնորդել էր Վ. Գասպարիի նկատմամբ տուգանք նշանակել 50 հազար դրամի չափով: Իսկ Վ. Գասպարիի պաշտպան, փաստաբան Մուշեղ Շուշանյանը միջնորդել էր իր պաշտպանյալի նկատմամբ կայացնել արդարացման դատավճիռ:
Ինչպես «Փաստինֆո»-ի թղթակցի հետ զրույցում պարզաբանել է պաշտպանը, ըստ Վճռաբեկ դատարանի որոշման մեջ արտահայտված իրավական դիրքորոշման, խուլիգանություն չի կարող համարվել այն արարքը, որն ուղղված է կոնկրետ անձի դեմ: «Նկատի ունենալով, որ տվյալ դեպքում Վ. Գասպարիի արտահայտություններն ուղղված են եղել նախկին ոստիկանապետի հասցեին, Վ. Գասպարիի գործողությունները չեն կարող համարվել խուլիգանություն»,- ասաց պաշտպանը՝ նկատելով, որ նախկին ոստիկանապետի գործողությունները՝ քաղաքացիներին հրելով ՝ ճանապարհ բացելով, սադրել են ակցիայի մասնակիցների կողմից համապատասխան վերաբերմունք:
