Եվրոպական 5 երկրներ դադարեցնում են հակագրիպային որոշ պատվաստանյութերի շրջանառությունը
Գերմանիայի ու Իսպանիայի իշխանությունները դադարեցրել են Novartis դեղարտադրող ընկերության որոշ պատվաստանյութերի վաճառքն ու շրջանառությունն իրենց երկրների տարածքում: Ինչպես հաղորդում է Euronews-ը, նշված երկրներն այդ որոշումը կայացրել են՝ առանց սպասելու պատվաստանյութերի կողմնակի ազդեցությունների մասին ստուգումների արդյունքների ստացմանը: Ավելի վաղ նման որոշում էին կայացրել նաև Իտալիան, Ավստրիան ու Շվեյցարիան:
Խոսքը Novartis ընկերության Agrippal և Fluad պատվաստանյութերի մասին է: Պատվաստանյութերի շրջանառության դադարեցման որոշումը պայմանավորված է եղել դրանցում սպիտակ գույնի մասնիկների հայտնաբերմամբ, ինչպես նաև պատվաստումից մի քանի ժամ անց մարդկանց մոտ առաջացող բորբոքային ռեակցիայով:
Novartis ընկերությունից հայտնել են, որ պատվաստանյութերում առկա մասնիկները դրանում հայտնվել են պատրաստման ընթացքում, ինչը ոչ մի ազդեցություն չի թողնում պատվաստանյութի անվտանգության ու արդյունավետության վրա:
