«Միլանոյի» գործով կներկայացվեն ապացույցներ
Այսօր Երևանի Կենտրոն և Նորք-Մարաշ վարչական շրջանների դատարանում՝ դատավոր Գայանե Կարախանյանի նախագահությամբ, տեղի ունեցավ նախնական դատական նիստ Երևանի Աբովյան 4 հասցեում «Միլանո» խանութի նախկին սեփականատերերից մեկի՝ «Օլիմպ» արտադրական կոոպերատիվի հայցադիմումի գործով:
Հայցվորը պահանջում է պատասխանողներից՝ Հայաստանի Հանրապետությունից և «Ավո Ֆ. Մ. Հ.» ՍՊ ընկերությունից հանուն պետական կարիքների օտարված գույքի դիմաց ողջ փոխհատուցումը: Ցայժմ, ըստ կողմի, փոխհատուցվել է 5-8 մլն դոլար արժողությամբ գույքի 1/10-րդ մասից էլ ավելի քիչ:
Ինչպես նշեց հայցվորի ներկայացուցիչ Տիգրան Հայրապետյանը, փոխհատուցման պայմանագրում հաշվի չեն առնվել շինության 2-րդ, 3-րդ, նկուղային հարկերը և հողատարածքը:
Դատարանը առաջարկեց հայցվոր կողմին հայցի հիմքերն ապացուցող փաստաթղթեր ներկայացնել և կողմին մեկամսյա ժամկետ տրամադրեց պետական մարմիններից անհրաժեշտ փաստաթղթեր պահանջելու և ստանալու համար: Դրանից հետո պատասխանող կողմը կներկայացնի իր դիրքորոշումը հայցապահանջի վերաբերյալ:
Հիշեցնենք, որ խնդրով դատական գործընթացներն ընթանում են 5 տարուց ավելի, իսկ Մարդու իրավունքների եվրոպական դատարան ուղարկված բազմաթիվ գանգատները միացվել են մեկ վարույթում:
Հաջորդ դատական նիստը տեղի կունենա նոյեմբերի 27-ին:
