Սախարովի մրցանակը շնորհվեց երկու իրանցիների
Ազատախոհության համար Սախարովի անվան մրցանակը այս տարի շնորհվել է երկու իրանցիների` փաստաբան Նասրին Սոթուդեին և կինոռեժիսոր Ջաֆար Փանահիին։ Ըստ «Ազատություն» ռադիոկայանի` այս մասին այսօր հայտարարվել է Ստրասբուրգում։
Երկու գործիչները առաջին իրանցիներն են, որոնք արժանանում են Եվրախորհրդարանի հեղինակավոր մրցանակին։
Իրանցի ընդդիմադիր ակտիվիստների շահերը ներկայացնող փաստաբան Նասրին Սոթուդեին անցած տարի երկրի ազգային անվտանգության օրենքները խախտելու մեղադրանքով դատապարտվել է 11 տարվա ազատազրկման։
Ջաֆար Փանահին նմանատիպ մեղադրանքներով 2010 թվականին դատապարտվել է 6 տարվա ազատազրկման, ռեժիսորին նաև 20 տարով արգելվել է ֆիլմեր նկարահանել։
Սախարովի անվան մրցանակը շնորհվում է մարդու իրավունքների և ազատախոհության պաշտպանությանը նվիրված գործիչների եւ կազմակերպությունների, այն ներառում է 50 հազար եվրո դրամական պարգև։
Այս տարի մրցանակի հավակնորդների թվում էին բելառուսցի իրավապաշտպան Ալես Բելյացկին եւ ռուսաստանյան Pussi Riot փանք ռոք խումբը։
