«Ես չէի ցանկանա, որ հայ ժողովուրդը հունգար ժողովրդին մեջքով շրջվեր այնպես, ինչպես հունգարական կառավարությունն արեց հայ ժողովրդի նկատմամբ». Սերժ Սարգսյան
![](https://168.am/wp-content/uploads/2012/08/Serj-sargsyan-300x2791.jpg)
Հունգարական ATV հեռուստաընկերությանը տված հարցազրույցում ՀՀ նախագահ Սերժ Սարգսյանն ասել է, թե Հունգարիայի ժողովուրդը մեր թշնամին չէ, չնայած այն սխալ որոշմանը, որ ընդունել է պաշտոնական Բուդապեշտը: Այս մասին տեղեկացնում է «Արմենպրեսը»:
«Մենք դա սխալ որոշում ենք համարում»,- ասել է Սարգսյանը` անդրադառնալով Սաֆարովի արտահանձման վերաբերյալ Հունգարիայի քայլին: Ադրբեջանի վարած քաղաքականության մեջ Սարգսյանը չի տեսնում Լեռնային Ղարաբաղի հակամարտության խաղաղ կարգավորման ձգտում, սակայն «Հայաստանն ամեն հնարավորն անում է հասնելու այդ նպատակին»: Նախագահը միաժամանակ ընդգծել է, որ Լեռնային Ղարաբաղի դեմ Ադրբեջանի կողմից ռազմական հարձակման դեպքում Հայաստանը կպաշտպանի Լեռնային Ղարաբաղի քաղաքացիներին:
Ս. Սարգսյանը նշել է, թե Հունգարիայի կառավարությունը գիտակցել է որոշման հետևանքները, իսկ այդ երկրի բարձրաստիճան պաշտոնյաներն ամիսներ շարունակ հավաստիացնում էին Հայաստանին, թե Սաֆարովը չի արտահանձնվի: «Ես չէի ցանկանա, որ հայ ժողովուրդը հունգար ժողովրդին մեջքով շրջվեր այնպես, ինչպես հունգարական կառավարությունն արեց հայ ժողովրդի նկատմամբ»,- ասել է ՀՀ նախագահ Սերժ Սարգսյանը:
Նա ընդգծել է, որ հայ և հունգար ժողովուրդների միջև միշտ լավ հարաբերություններ են եղել, մշտապես եղել են հայ հերոսներ, ովքեր իրենց կյանքն են զոհել Հունգարիայի անկախության համար: Նախագահը շեշտել է, որ անհրաժեշտության դեպքում նման հերոսներ կրկին կլինեն: Սերժ Սարգսյանի խոսքով` Սաֆարովին արտահանձնելու վերաբերյալ Հունգարիայի կառավարության որոշումն ավելի է սրել հայ-ադրբեջանական հակամարտությունը` միաժամանակ վնաս հասցնելով նաև Եվրոպական Միության արևելյան քաղաքականությանը: