Թիկնապահը Հայաստանում չի գնահատվում. Նրանց շահագործում են
«Պահապան արծիվ» թիկնապահական ակադեմիայի տնօրեն Արսեն Դավթյանի խոսքով` Հայաստանում այսօր կան բոլոր չափանիշներին համապատասխանող թիկնապահներ, բայց նրանց թիվը շատ փոքր է: Նա չցանկացավ նշել այն մարդկանց անունները, ում մոտ նրանք աշխատում են:
Արսեն Դավթյանի կարծիքով`այսօր թիկնապահները բավական բացասական կերպար ունեն, բայց չի կարելի բոլորին նույնացնել. «Չկա գյուղ, որ շուն չլինի»,- ասաց նա:
Արսեն Դավթյանի գնահատմամբ` թիկնապահը Հայաստանում չի գնահատվում: «100.000-ից է սկսվում այսօր թիկնապահի աշխատավարձը, որը ոչ մի կերպ չի համապատասխանում նրա արած աշխատանքին: 26-27 ժամ են աշխատում հայ թիկնապահները, այսինքն՝ նրանց շահագործում են»:
«Պահապան արծիվ» թիկնապահական ակադեմիայի տնօրենի հաղորդմամբ`բավական շատ են թիկնապահ դառնալ ցանկացող երիտասարդները: Պատճառն, ըստ նրա, հիմնականում այն է, որ նրանք չեն կարողանում իրենց մարզաձևերում հաջողությունների հասնել և փորձում են իրենց ուժերն այս ասպարեզում: Բավական շատ են նաև իգական սեռի ներկայացուցիչները, ովքեր հետաքրքրվում են այս գործով:
Արսեն Դավթյանը հավելեց, որ իրենց ակադեմիայում այս և անցյալ տարի ոչ մի ուսանող լիցենզիա չի ստացել, քանի որ չափանիշներին համապատասխանողներ չեն եղել:
