ՀՊՃՀ-ում կբացվի Microsoft-ի ՏՏ ակադեմիա
Առաջիկայում Microsoft-ի ՏՏ ակադեմիա կբացվի Հայաստանի պետական ճարտարագիտական համալսարանում, որտեղ կարող են ոչ միայն սովորել ուսանողները, այլ նաև՝ ՏՏ մասնագետները:
Այս մասին այսօր՝ հոկտեմբերի 4-ին, լրագրողների հետ հանդիպման ժամանակ ասաց Microsoft ընկերության հայաստանյան գրասենյակի ղեկավար Գրիգոր Բարսեղյանը՝ նշելով, որ ակադեմիան կունենա նաև նախագծային արտադրական մաս, և կարող է հետագայում նաև պատվերներ ընդունել:
Գրիգոր Բարսեղյանի տեղեկացմամբ՝ նոր ստեղծվող կառույցն ասես կամուրջ կլինի բիզնեսի և բուհի միջև, քանի որ այստեղ կկարողանան ոչ միայն տեսական գիտելիքներ ձեռք բերել, այլև գործնականում կիրառել դրանք:
«ՏՏ ակադեմիայի բացման նախապատրաստական աշխատանքներն արդեն կատարված են, ներկայում այդտեղ դասավանդող դասախոսները վերապատրաստման դասընթացներ են անցնում»,- ասաց Գ. Բարսեղյանը: Նրա խոսքով՝ ուսուցումն ակադեմիայում կլինի սիմվոլիկ գումարով, իսկ ուսումն ավարտելուց հետո շրջանավարտները կարող են սերտիֆիկացիայի քննություններ հանձնել և դառնալ Microsoft-ի սերտիֆիկացված մասնագետներ:
Նշենք, որ ակադեմիայի ծրագիրը կներկայացվի վաղը մեկնարկող «ԴիջիԹեք» տեխնոլոգիական ցուցահանդեսի ժամանակ: Նախատեսվում է, որ ակադեմիան կսկսի գործել արդեն հաջորդ տարվանից:
