Գերմանիայի առաջիկա դաշնային ընտրություններում հայտնի է կանցլեր Անգելա Մերկելի մրցակիցը
Գերմանիայի ֆինանսների նախկին նախարար Պեեր Շտայնբրյուկը հաջորդ տարի կայանալիք դաշնային ընտրություններում կդառնա կանցլերի պաշտոնում սոցիալ-դեմոկրատների թեկնածուն: Այս մասին հայտնում է Reuters գործակալությունը:
«Այո, մենք կարող ենք հաստատել այդ տեղեկությունը»,- հայտնել է աղբյուրն այն բանից հետո, երբ Bild թերթում տեղեկություն է հայտնվել Շտայնբրյուկի առաջադրման մասին:
Այսպիսով՝ Շտայնբրյուկը կդառնա գործող կանցլեր Անգելա Մերկելի մրցակիցը: Մերկելը Քրիստոնեա-դեմոկրատական միության ղեկավարն է:
Աղբյուրները հաստատում են, որ հօգուտ Շտայնբրյուկի՝ նախընտրական մրցապայքարին մասնակցությունից հրաժարվել են Սոցիալ-դեմոկրատական կուսակցության առաջնորդներ Զիգմար Գաբրիելն ու նախկին արտգործնախարար Ֆրանկ-Վալտեր Շտայմայերը:
Նշենք, որ Պեեր Շտայնբրյուկը երկրի ֆինանսների նախարարի պաշտոնը զբաղեցրել է 2005-2009թթ.:
