Օսկանյանին անձեռնմխելիությունից զրկելու միջնորդությունը ԱԺ-ում կքննարկվի երկուշաբթի
Հայաստանի գլխավոր դատախազ Աղվան Հովսեփյանի`ՀՀ ԱԺ ԲՀԿ-ական պատգամավոր Վարդան Օսկանյանին որպես մեղադրյալ ներգրավելու մասին Ազգային ժողով ներկայացված գրավոր միջնորդությունը ԱԺ-ում կքննարկվի հերթական քառօրյայի առաջին օրը` հոկտեմբերի 1-ին` արտահերթ կարգով: Այս մասին NEWS.am-ի թղթակցի հետ զրույցում ասել է ԱԺ նախագահ Հովիկ Աբրահամյանի մամուլի քարտուղար Գոհար Պողոսյանը:
««Աժ Կանոնակարգ օրենքի» 36-րդ եւ 37-րդ հոդվածներում մեղադրյալ ներգրավելու հարցը դասվում է պարտադիր եւ ըստ անհրաժեշտության քննարկվող հարցերի շարքին եւ պարտադիր ընդգրկվում է ԱԺ նիստերի օրակարգ: Իսկ կանոնակարգի 55-րդ հոդվածը սահմանում է, որ պարտադիր եւ ըստ անհրաժեշտության օրակարգ ընդգրկված հարցերը, այդ թվում` վերոնշյալը, քննարկվում են արտահերթ»,- ասել է մամուլի քարտուղարը:
Նշենք, որ Հայաստանի գլխավոր դատախազ Աղվան Հովսեփյանը երեկ` սեպտեմբերի 27-ին, Ազգային Ժողով էր ներկայացրել գրավոր միջնորդագիր՝ ՀՀ ԱԺ ԲՀԿ-ական պատգամավոր Վարդան Օսկանյանին ՀՀ կառավարությանն առընթեր ազգային անվտանգության ծառայության քննչական վարչության վարույթում քննվող քրեական գործով որպես մեղադրյալ ներգրավելու համաձայնություն տալու մասին:
