ՀՀ ԱԳ փոխնախարարը Ամմանում մասնակցել է Հայաստանի պատվավոր հյուպատոսության բացմանը

Սեպտեմբերի 16-ին Հայաստանի Հանրապետության և Հորդանանի Հաշիմյան Թագավորության արտաքին գործերի նախարարությունների միջև քաղաքական խորհրդակցություններ անցկացնելու նպատակով Հորդանանի մայրաքաղաք Ամման է ժամանել ՀՀ ԱԳ նախարարի տեղակալ Սերգեյ Մանասարյանի գլխավորած պատվիրակությունը:

ՀՀ ԱԳՆ մամլո գրասենյակից 168.am-ին հայտնում են, որ Հորդանանի ԱԳ նախարարությունում կայացած հանդիպման ընթացքում կողմերը քննարկել են երկկողմ հարաբերությունների զարգացման հեռանկարներն ու հնարավորությունները, այդ թվում` քաղաքական, տնտեսական, մշակութային, գիտակրթական, հումանիտար և այլ հարցեր, ինչպես նաև անդրադարձան տարածաշրջանային խնդիրներին:

Երկուստեք կարևորվել է նման խորհրդակցությունների պարբերաբար անցկացումն ու բարձրաստիճան պատվիրակությունների փոխայցելությունները:

Նույն օրը ԱԳ նախարարի տեղակալի գլխավորած պատվիրակությունը մասնակցել է Ամմանում ՀՀ պատվավոր հյուպատոսության պաշտոնական բացմանը, այնուհետև ՀՀ Անկախության տարեդարձին նվիրված ընդունելություններին, որոնց ներկա էին դիվանագետներ, կառավարության և խորհրդարանի անդամներ, հասարակական-քաղաքական գործիչներ, ինչպես նաև հայ համայնքի ներկայացուցիչներ:

ՀՀ ԱԳՆ պատվիրակության այցի շրջանակներում նախատեսվում են նաև հանդիպումներ ՀՀԹ արտաքին գործերի, բարձրագույն կրթության և գիտության, զբոսաշրջության նախարարների, գործարար խորհրդի, Հորդանանի և Ամմանի առևտրա-արդյունաբերական պալատների անդամների հետ:

Տեսանյութեր

Լրահոս