Մեքսիկայում բանտից 132 բանտարկյալ է փախել
Մեքսիկայի՝ ԱՄՆ-ի սահմանի մոտ գտնվող Կոաուիլա նահանգի Պյեդրաս Նեգրաս քաղաքի բանտից փախել է 132 մարդ: Դեպքը տեղի է ունեցել երեկ՝ սեպտեմբերի 17-ին:
Բանտարկյալները բանտից դուրս են եկել թունելով: Թունելի երկարությունը կազմել է 7 մ, լայնությունը` 1,2 մ, խորությունը` 2,9 մ, հայտնում է Reuters-ը` հղում անելով տեղական իշխանություններին:
Կոաուիլայի անվտանգության ծառայությունում չեն բացառում, որ բանտի պահակները կարող էին կաշառված լինել, հայտնում է «lenta.ru»-ն:
Իշխանությունները 200 հազար պեսո (15,7 հազար դոլար) պարգեւ են խոստացել փախստականների մասին տեղեկության համար: Զանգվածային փախուստի մասին տեղեկացված են նաեւ ԱՄՆ-ի սահմանապահները:
Պյեդրաս Նեգրասի բանտում պահվում են 734 բանտարկյալներ:
Այդ փախուստը դարձել է Մեքսիկայում ամենախոշորը վերջին տարիների ընթացքում: 2010 թվականի վերջին ավելի քան 150 բանտարկյալ փախել էր Նուեւո Լարեդո քաղաքի բանտից:
