Երևանում ԱՄՆ դեսպանատունը Հայաստանում գտնվող իր քաղաքացիներին զգոնության կոչ է արել
Երեւանում Միացյալ Նահանգների դեսպանատունը իր պաշտոնական կայքում երեկ հաղորդագրություն է տեղադրել, որով, «հաշվի առնելով Եգիպտոսում եւ Լիբիայում Միացյալ Նահանգների դիվանագիտական առաքելությունների վրա տեղի ունեցած հարձակումները, Հայաստանում գտնվող ԱՄՆ-ի քաղաքացիներին նախազգուշացնում է ողջ աշխարհում ԱՄՆ-ի քաղաքացիների հանդեպ հնարավոր ահաբեկչական գործողությունների շարունակվող սպառնալիքի մասին»։
«ԱՄՆ-ի քաղաքացիներին խորհուրդ է տրվում պահպանել զգոնության բարձր մակարդակ եւ համապատասխան քայլեր ձեռնարկել անվտանգության իրազեկության աստիճանը բարձրացնելու համար», – նշում է Հայաստանում Միացյալ Նահանգների դիվանագիտական առաքելությունը` շարունակելով. – «Երեւանում ԱՄՆ-ի դեսպանատունը որոշակի տեղեկատվություն չունի, որ հիշյալ իրադարձությունները կարող են ազդել Երեւանում անվտանգության վիճակի վրա: Այնուամենայնիվ, բոլոր ԱՄՆ-ի քաղաքացիները պետք է առաջիկայում հատուկ զգոնություն ցուցաբերեն իրենց անձնական անվտանգության առումով եւ տեղական իշխանություններին տեղեկացնեն բոլոր կասկածելի հանգամանքների մասին»:
Fox News-ի փոխանցմամբ` Միացյալ Նահանգների Պետդեպարտամենտը հնարավոր բողոքի ակցիաների եւ ամերիկյան դիվանագիտական առաքելությունների անձնակազմին սպառնացող վտանգի մասին զգուշացրել է աշխարհի յոթ երկրներում` Բուրունդիում, Քուվեյթում, Սուդանում, Թունիսում, Զամբիայում, Եգիպտոսում եւ Հայաստանում գտնվող ամերիկյան դեսպանատներին:
Հայաստանում Միացյալ Նահանգների դեսպանությունը, այդուհանդերձ, այսօր տարածած հաղորդագրությունում ընդգծել է, որ աշխատում է բնականոն հունով։
«Եգիպտոսում եւ Լիբիայում տեղ գտած վերջին հարձակումներից ելնելով` օտարերկրյա պետություններում, այդ թվում Հայաստանում, գտնվող բոլոր ամերիկյան քաղաքացիները նախազգուշացվում են, որ հանդես բերեն զգոնություն եւ հետեւեն իրավիճակի զարգացումներին», – փոխանցում է ամերիկյան դիվանագիտական առաքելությունը` վերստին նշելով, որ չունի որեւէ տեղեկություն, «որը մատնանշի, որ այդ դեպքերը կարող են բացասաբար անդրադառնալ անվտանգության հետ կապված իրավիճակի վրա Հայաստանում»։
