«Dasaran.am»-ի հետ համագործակցելու համար վերապատրաստվել են Երևանի շուրջ 200 դպրոցների մասնագետներ
2012-2013 ուսումնական տարվան ընդառաջ «Dasaran.am» կրթական ծրագիրն ակտիվորեն սկսել է իր աշխատանքները: Օգոստոսի 27-ից մեկնարկել է Երևանի դպրոցների օպերատորների վերապատրաստումը, որի ընթացքում հնարավորություն է տրվում ոչ միայն մանրամասն ծանոթանալ կրթական ծրագրի կողմից ստեղծած էլեկտրոնային գործիքին, այլև համակարգիչներով գործնական առաջադրանքներ կատարել՝ ամրապնդելով ստացած տեսական գիտելիքները:
Վերապատրաստման ընթացքում «Dasaran.am»-ի պատասխանատուների և օպերատորների միջև տեղի են ունենում աշխատանքային ակտիվ քննարկումներ, որոնք նպաստում են գործիքի ավելի ճկուն ու հարմարավետ դարձնելուն:
Վերապատրաստմանն օրական մասնակցում է 20 օպերատոր, և արդեն հասցրել են վերապատրաստվել Երևանի շուրջ 200 դպրոցների օպերատորներ: Կրթական ծրագիրը տրամադրում է նաև «Dasaran.am»-ից օգտվելու մանրամասն առցանց ուղեցույց և ուսուցանող տեսանյութ, ինչպես նաև ապահովում ծրագրի հետագա աշխատանքների սահուն ու անխափան ընթացքը:
Բացի այդ՝ մեկնարկել է աշխատանքը նաև ՀՀ 7 մարզերի՝ Արագածոտնի, Արարատի, Կոտայքի, Գեղարքունիքի, Արմավիրի, Շիրակի և Լոռվա մարզկենտրոնների դպրոցների օպերատորների հետ:
Հիշեցնենք, որ «Dasaran.am» կրթական ծրագրին աջակցում են ՀՀ ԿԳ նախարարությունը և Երևանի քաղաքապետարանը, իսկ մարզերում համապատասխան գործունեություն ծավալելու նպատակով կրթական ծրագիրն ստացել է ՀՀ վարչապետ Տիգրան Սարգսյանի թույլտվությունը: Նշենք, որ «ՎիվաՍել-ՄՏՍ» ընկերության աջակցության շնորհիվ ծրագիրն իրականացվում է անվճար հիմունքերով:
