«Խոսքը վերաբերում է ոչ թե ԵՄ-ի հետ վիզաների ազատականացման ռեժիմին, այլ վիզաների ազատականացման երկխոսությունը մեկնարկելուն». ԱԳՆ փոխնախարար
Այսօր Ազգային ժողովում 2018 թվականի պետական բյուջեի նախագծի քննարկման ժամանակ «Ծառուկյան» դաշինքի պատգամավոր Լուիզա Սարգսյանը ՀՀ արտաքին գործերի նախարարի տեղակալ Կարեն Նազարյանից հետաքրքրվեց՝ արդյոք ԵՄ-ի հետ վիզաների ազատականացումը շա՞տ է ձգձգվելու:
Ի պատասխան՝ փոխնախարարն ասաց. «Այստեղ տեղի է ունենում որոշակի շփոթ: Խոսքը վերաբերում է ոչ թե վիզաների ազատականացման ռեժիմին, այլ վիզաների ազատականացման երկխոսությունը մեկնարկելուն: 2015 թվականին Ռիգայի գագաթաժողովի հռչակագրում կան հստակ ձևակերպումներ, որ ԵՄ-ն պետք է Հայաստանի հետ սկսի վիզաների ազտականացման անհրաժեշտ գործընթաց:
Արտաքին գործերի նախարարությունը, նախարարն անձամբ տարբեր առիթներով հիշեցնում է եվրոպական կողմին, որ 2015 թվականի Ռիգայի գագաթաժողովում ունենք ստանձնած համատեղ հանձնառություն, և շատ կարևոր է դրա իրականացումը»:
