Հայկական Volterman-ը գերազանցեց 1 միլիոն դոլար արդյունքը

Ինչպես արդեն տեղեկացրել ենք՝ հայկական Volterman խելացի դրամապանակը ներկայացվել էր IndieGoGo հարթակում, որտեղ ստարտափի զարգացմանը նպաստելու համար սկսվել էր դրամահավաք: Մեկ օրվա ընթացքում հավաքվել էր անհրաժեշտ գումարի կեսից ավելին՝ ավելի քան 30 հազար դոլար: Հայկական դրամապանակը մեծ հետաքրքրություն է առաջացրել արտասահմանցիների մոտ:

Երեկ երեկոյան ավարտվել է դրամահավաքը: Հայկական ստարտափը ստացել է ավելի քան 1 միլիոն դոլար ներդրում:

Աշխարհի ամենահզոր դրամապանակն առաջարկում է նորարարական լուծումներ, որոնց միջոցով գրեթե անհնար է կորցնել դրամապանակը:

Սմարթֆոնի միջոցով ցանկացած պահի կարող եք իմանալ, թե աշխարհի որ ծայրում է ձեր դրամապանակը: Դուք կարող եք տեղեկանալ դրամապանակի կոորդինատների մասին Free Global GPS-ի միջոցով: Այսպիսով, դուք կարող եք ոչ միայն տեսնել, թե որտեղ եք թողել դրամապանակը, այլև հետևել դրա տեղափոխություններին, եթե ինչ-որ մեկը գտել կամ գողացել է այն:

Բացի այդ, հայկական խելացի դրամապանակը Bluetooth alarm-ի միջոցով հաղորդագրություն է ուղարկում տիրոջ սմարթֆոնին: Սա տեղի է ունենում այն ժամանակ, երբ սմարթֆոնի և դրամապանակի միջև հեռավորությունը շատ է մեծանում:

Եթե ձեր դրամապանակը գողանան, ապա դուք հեշտությամբ կարող եք իմանալ, թե ով է դա արել: Դրամապանակն ունի լուսանկար անող համակարգ՝ Thief Detection camera, որը նկարում է այն ժամանակ, երբ ինչ-որ մեկը բացում է այն: Նկար անելու հնարավորությունն ավտոմատանում է, երբ ակտիվացնում եք lost mode-ը: Դրամապանակը բացած անձի նկարը հաղորդագրության տեսքով գալիս է սմարթֆոնին:

Բացի ապահով դրամապանակ լինելուց՝ Volterman-ն ունի ևս մի քանի հետաքրքիր գործառույթներ:

Հաճախ սմարթֆոնի լիցքավորումն ավարտվում է ամենաանհրաժեշտ պահին: Խելացի դրամապանակի շնորհիվ դուք կարող եք լիցքավորել ձեր հեռախոսը ցանկացած պահի՝ անլար և լարային ռեժիմներում: Բացի այդ, Global WiFi hotspot-ի միջոցով դուք կարող եք օգտվել վայ-ֆայից ցանկացած վայրում:

Այժմ շուկայում հասանելի է դրամապանակի երեք տարբերակ: Մեկը նախատեսված է ճամփորդությունների համար, մյուսը՝ երկփեղկանի է, իսկ երրորդը՝ քարտերի համար:

Օրերս Հայաստանի Հանրապետության վարչապետ Կարեն Կարապետյանը նշել էր, որ ինքը ևս ձեռք կբերի խելացի դրամապանակ:

«Աջակցում եմ հայկական հերթական start-up-ին։ Ամրագրեցի իմ Volterman սմարթ դրամապանակը»,- այս մասին ֆեյսբուքյան իր էջում գրել է Կարեն Կարապետյանը։

Հիշեցնենք, որ Volterman-ը մեկն էր այն ստարտափներից, որ Նորարարությանն ուղղված համաֆինանսավորվող դրամաշնորհային մրցույթում (IMG) ստացել էր դրամաշնորհ: