«Այսօր ՀՀ-ի պայմաններով որևէ քայլ որ ձեռնարկում ենք, ավելի շատ խոչընդոտների ենք հանդիպում»
Մասնագիտությամբ ռեժիսոր Հովհաննես Ստեփանյանը 1985 թվականից Հայաստանում հաստատված սփյուռքահայ գործարար է, ում պնդմամբ՝ իր աշխատանքով զբաղվելու փոխարեն՝ ստիպված է զբաղվել իր դեմ արհեստական խոչընդոտների հաղթահարմամբ, իր իրավունքները պաշտպանելով:
Հովհաննես Ստեփանյանը պատմեց, որ տարիներ առաջ ստեղծել է գյուղական անասնապահական տնտեսություն՝ «Գեղաստղ» անվամբ: Այս ծրագրի մեջ ներառված են մեղվապահություն, ոչխարաբուծություն, ջայլամաբուծություն, գոմշաբուծություն, և այլն: Ծրագիրը տարածված է մի քանի մարզերում: Աշխատում են երիտասարդ ընտանիքները՝ գյուղում մնալով՝ ապահովելով իրենց ապրուստը: Նրանք նաև ընդունում են զբոսաշրջիկների: Նրա խոսքով՝ ստեղծված է մի համայնք, որտեղ զբոսաշրջիկն ամեն ինչ բնական է վայելում:
«Մենք տեսնում ենք, թե որ մարզում որ գյուղատնտեսական ոլորտն է զարգացած, ըստ այդմ էլ՝ հենց այդ ուղղությամբ ենք աշխատում: Օրինակ՝ Գեղարքունիքում զարգացած է հացահատիկը, Վայոց Ձորում՝ մեղվապահությունը: Մենք զարգացնում ենք հենց այս ուղղությունները և վերականգնում ենք ավանդական միջոցները»,- ասաց բանախոսը:
Հովհաննես Ստեփանյանը 1985 թվականից Հայաստանում է, իր ժամանակի մեծ մասն անցկացնում է սարերում, և, քանի որ Հայաստանը լավ է իմանում, հենց ինքն էլ ձեռնարկում է իր բիզնեսը՝ հանդիպելով շատ խոչընդոտների:
«Դժբախտաբար, այսօր ՀՀ-ի պայմաններում որևէ քայլ որ ձեռնարկում ենք, ավելի շատ խոչընդոտների ենք հանդիպում՝ լինի ծրագրավորված թե ոչ: Օրինակ՝ մարզի Շատին համայնքում Բարձրավոլտ էլեկտրական ցանցեր ընկերությունը (ԲԷՑ) խոչընդոտում է իրենց աշխատանքը: ԲԷՑ-ը, ըստ նրա, իրենց հիմնադրած ֆերմային հարակից տարածքով բարձրավոլտ էլեկտրալարեր է անցկացրել, ինչի հետևանքով անհարմարություններ են առաջ եկել: Աշխատանքների հետևանքով ժայռաբեկորներ են առաջացել, որոնք փակել են անասունների` արոտավայր բարձրանալու ճանապարհը: Իրենց գործունեությունն էլ ԲԷՑ-ը համարել է գերակա շահ»,- նշեց նա:
Հովհաննես Ստեփանյանի խոսքով՝ այստեղ պետությունն էլ մեղավոր չէ: Գլխին կանգնած է մի մարդ, որն ասում է՝ գերակա շահ է, ու ինքն ուտում է այդ գումարներն ու ամեն ինչ այս վիճակում թողնում:
Անի Թորոսյան
