Տորթ «Թռչնի կաթի» հեղինակային բաղադրատոմսը
«Թռչնի կաթն» առաջին տորթն է, որի համար խորհրդային ժամանակաշրջանում տրվել է արտոնագիր և որը համաշխարհային ճանաչում է ստացել: Բաղադրատոմսի հեղինակն է Մոսկվայի «Պրահա» ռեստորանի քաղցրավենիքի արտադրամասի ղեկավար Վլադիմիր Գուրալնիկը:
Էներգետիկ արժեքը մեկ չափաբաժնում
Կալորիականություն – 491 կկալ
Սպիտակուցներ – 4 գ
Ճարպեր – 28.2 գ
Ածխաջրեր – 55.7 գ
Բաղադրիչներ
Շերտեր
1. Կարագ – 100 գ
2. Շաքարավազ – 100 գ
3. Ալյուր – 140 գ
4. Ձու – 2 հատ
Սուֆլե
1. Ձվի սպիտակուց – 2 հատ
2. Շաքարավազ – 460 գ
3. Կիտրոնաթթու – 1/2 թ/գ
4. Ագար-ագար – 2 թ/գ (կամ ժելատին՝ 5 թ/գ)
5. Կարագ – 200 գ
6. Խտացրած կաթ – 100 գ
7. Վանիլին
Զարդարելու համար
1. Շոկոլադ – 75 գ
2. Կարագ – 50 գ
Պատրաստման եղանակը
1. Շերտեր: Շաքարավազը հարել կարագի հետ:
2. Հերթով ավելացնել ձվերը, լավ հարել՝ մինչև պնդանալը:
3. Ավելացնել ալյուրը, խմոր հունցել:
4. Պատրաստի խմորը շրջանաձև քսել թխման համար նախատեսված թղթի վրա ապագա տորթի չափով և թխել 10 րոպե, 230 աստիճան ջեռոցում: Թխել նմանատիպ 2 շերտ:
5. Սառեցնել՝ առանց թղթերը հանելու: Տաք վիճակում եզրերն ուղղել և դարձնել այն կաղապարի չափով, որի մեջ պետք է հավաքվի տորթը:
6. Սուֆլե: Ագար-ագարը նախապես թրջել 150 գ ջրի մեջ: Ագար-ագարը ջրով դնել կրակի վրա, եփել՝ մինչև ագարի լրիվ հալվելը:
7. Եռացող ագարի մեջ լցնել շաքարավազը և անընդհատ խառնելով՝ սպասել, որ այն նորից եռա: Հենց եռա և փրփրի, նշանակում է՝ օշարակը պատրաստ է: Թողնել, որ մի փոքր սառչի:
8. Այդ ընթացքում փափուկ կարագին ավելացնել խտացրած կաթը, վանիլինը և լավ հարել:
9. Սառեցրած սպիտակուցները լավ հարել, ավելացնել կիտրոնաթթուն և նորից հարել:
10. Չդադարեցնելով հարելը՝ բարակ շիթով ավելացնել արդեն մի փոքր սառած օշարակը: Հարել՝ մինչև զանգվածը դառնա պինդ և խիտ: Ավելացնել կարագային զանգվածը:
11. Տորթի հավաքելը: Կաղապարի հատակը պատել թղթով, վրան դնել խմորի առաջին շերտը և լցնել սուֆլեի կեսը: Սուֆլեի վրա դնել երկրորդ շերտը և վրան լցնել մնացած սուֆլեն: Ուղղել և ժամով դնել սառնարանը:
12. Հալեցնել շոկոլադը կարագի հետ:
13. Հալեցրած շոկոլադը լցնել արդեն պատրաստի տորթի վրա: Թողնել սառչի և սկսել վրան «նկարելը»:
Պատրաստեց Անի Գաբուզյանը
