Սպանություն ԵՊՀ-ի տարածքում. գործը դատարանում է
2016թ. ապրիլի 8-ին 21-ամյա Ազատ Աբրահամյանի սպանության գործի նախաքննությունն ավարտվել է։ Մեղադրական եզրակացությամբ քրեական գործն ուղարկվել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարան։
2016թ. ապրիլի 8-ին Մ.Հերացու անվան թիվ 1 համալսարանական հիվանդանոցից ահազանգ էր ստացվել, որ «կրծքավանդակի ձախ կեսի կտրած-պատռված թափանցող վերք» ախտորոշմամբ բուժօգնության է տեղափոխվել 1995թ. ծնված Ազատ Աբրահամյանը: Ժամեր անց երիտասարդը, առանց գիտակցության գալու, հիվանդանոցում մահացել էր:
Ըստ ՀՀ Քննչական կոմիտեի՝ Ազատ Աբրահամյանին կյանքի համար վտանգավոր մարմնական վնասվածքը պատճառվել է ԵՊՀ-ին հարող տարածքում։ Նախնական քննության տվյալներով՝ 2016 թվականի ապրիլի 8-ին՝ ժամը 13:30-14:00-ն ընկած ժամանակահատվածում, ԵՊՀ-ին հարող տարածքում անձնական հարցեր պարզաբանելու նպատակով՝ Ա.Աբրահամյանի հետ հանդիպել է Սևան քաղաքի բնակիչ Գ.Սարգսյանը: Հանդիպմանը ներկա են եղել նաև երկու երիտասարդների ընկերները։
Գ.Սարգսյանի առաջարկով՝ Ա.Աբրահամյանի հետ առանձնացել են՝ զրույցն առանձին պայմաններում շարունակելու: Ըստ ձեռք բերված ապացույցների՝ հասնելով Կենսաբանության ֆակուլտետի մասնաշենքի հետնամասի մոտ՝ Գ.Սարգսյանն իր մոտ գտնվող դանակով հարվածներ է հասցրել Ա.Աբրահամյանի կենսականորեն կարևոր օրգաններին՝ պատճառելով կյանքի հետ անհամատեղելի մարմնական վնասվածքներ:
Սպանության մեջ մեղադրվողը կալանավորվել է։ Սեպտեմբերի 6-ին քրեական գործը մակագրվել է դատավոր Գագիկ Պողոսյանին։
