«Մարտական գործողություններին մասնակցելը միանշանակորեն չի նշանակում առողջության խաթարում». Արտեմ Ասատրյան

ՀՀ կառավարությունը նպատակահարմար չի համարում Ազ­­գա­յին ժողովի պատգամավորներ Էլինար Վարդանյանի, Ստեփան Մարգարյանի և Վահե Հովհաննիսյանի ներ­կա­յացրած՝ «Զինծառայողների և նրանց ընտանիքների անդամների սոցիալական ապա­հո­վության մասին» Հայաստանի Հանրապետության օրենքում լրացում կատարելու մա­սին» օրենքի նախագծի ընդունումը: ՀՀ կառավարության այսօրվա նիստի ընթացքում ՀՀ աշխատանքի և սոցիալական հարցերի նախարար Արտեմ Ասատրյանը ներկայացրեց կառավարության եզրակացության նախագիծը:

Նախարարն ասաց, որ օրենքի նախագծում հստակեցման կարիք ունի «պարտադիր պետական սոցիալական ապահովագրություն» եզրույթը և խնդրո առարկան՝ ապահովագրությունը 3 տարի ժամկետով սահ­մանելու հանգա­ման­քը: Ըստ նրա՝ հարկ է նկատի ունենալ, որ ապահովագրության հիմքում ընկած է ապա­հովագրական պատահարը՝ այն դեպքը կամ իրադարձությունը, որը տեղի ունենալու հետևանքով առաջանում է ապահովագրական գումարը ստանալու իրավունքը.

«Այնինչ, ներ­կա­յաց­վող նախագծում, ըստ էության, որպես ապահովագրական դեպք դիտարկվում է մար­տա­կան գործողություններին մասնակցելը, ինչն ինքնին չի կարող հատուցում ստանալու իրավունք առա­ջացնել: Արդյունքում` օրենքով ապահովագրական գումարը, ըստ էության, վերածվում է մարտական գործողու­թյունների մասնակիցներին տրամադրվող դրամական նպաստների, ինչն ընդհանուր ոչինչ չունի ապահովագրության հետ»:

Արտեմ Ասատրյանն ասաց, որ խնդրո առարկա է նաև այն հանգամանքը, որ ապահովագրության իրավունքը սահման­վում է ծառայության ավարտից հետո, ինչպես նշված է հիմնավորման մեջ՝ մարտական գործո­ղու­թյուններին մասնակցելու հետևանքով ձեռք բերած առողջական խնդիրները լուծելու համար:

Ըստ նրա՝ անձը կարող է զինծառայությունն ավարտել մարտական գործողություններին մասնակցելուց շատ տարիներ անց, ինչը կասկածի տակ է դնում խնդրո առարկա գումարի արդյունավետությունը:

Արտեմ Ասատրյանն ասաց, որ ուշադրության է արժանի նաև այն հանգամանքը, որ մարտական գործողություններին մասնակցելը միանշանակորեն չի նշանակում առողջության խաթարում, իսկ առողջության` զին­վո­րական ծառայության հետ կապված երկարաժամկետ խաթարման` հաշմանդամ ճանաչվելու դեպքում անձի համար սահ­մանված են համապատասխան երաշխիքներ:

Մասնավորապես, նրա խոսքով, այս դեպքում, զինծառայողին տրվում է ապահովագրական գումար՝ առաջին խմբի հաշմանդամներին՝ 500 000 դրամ, երկրորդ խմբի հաշմանդամներին՝ 400 000 դրամ, երրորդ խմբի հաշմանդամներին՝ 300 000 դրամ:

«Միաժամանակ, այս դեպքում անձը, զինվորական կենսաթոշակից բացի, ձեռք է բերում համապատասխան ամենամսյա պարգևավճարի իրավունք, որի չափը, ըստ հաշմանդամության խմբերի, կազմում է 55 000 դրամ, 48 000 դրամ և 36 000 դրամ»,- ասաց Արտեմ Ասատրյանը: