Թբիլիսիի միջազգային օդանավակայանը ճանաչվել է լավագույններից մեկն Արևելյան Եվրոպայում
Грузия Online-ի փոխանցմամբ՝ Թբիլիսիի միջազգային օդանավակայանը Փարիզում անցկացված Skytrax World Airport Awards 2015-ի ժամանակ արդեն երկրորդ անգամ ճանաչվել է որպես Արևելյան Եվրոպայի լավագույն օդանավակայաններից մեկը: Այս մասին հայտարարել է TAV Georgia օպերատոր ընկերությունը:
Վերջինիս գլխավոր մենեջեր Մետե Երկալը հայտարարել է. «2014 թվականին Թբիլիսիի միջազգային օդանավակայանը սպասարկել է ավելի քան 1.5 միլիոն ուղևորի: 2014-2015 թվականներին հենց նրանց շրջանում անցկացված հարցման արդյունքներով էլ Թբիլիսիի օդանավակայանը ճանաչվել է լավագույններից մեկն Արևելյան Եվրոպայում»:
Հարցումների արդյունքներով՝ 2015 թվականին Արևելյան Եվրոպայի 10 լավագույն օդանավակայաններ են ճանաչվել Բուդապեշտի, Կիևի, Տալինի, Ռիգայի, Բրատիսլավայի, Բելգրադի, Թբիլիսիի, Սոֆիայի, Վառնայի ու Սկոպիեի օդանավակայանները:
