Պուտինը կարող է գարնանը փորձել գրավել Մարիուպոլը. ամերիկյան հետախուզություն
Ռուսական Интерфакс լրատվական գործակալության փոխանցմամբ՝ ԱՄՆ Ազգային հետախուզության տնօրեն Ջեյմս Կլեպերը հայտարարել է, որ Ուկրաինայում բախումները շարունակվելու են ողջ ընթացիկ տարվա ընթացքում:
Կլեպերը կարծում է, որ Ռուսաստանի նախագահ Վլադիմիր Պուտինը գարնանը կփորձի գրավել Մարիուպոլը: Կլեպերն այս մասին հայատարարել է ԱՄՆ Կոնգրեսում կազմակերպված լսումների ժամանակ: Կլեպերի խոսքերով՝ Ուկրաինայի հարավ-արևելքի կարգավիճակի մասին բանակցությունները կլինեն տևական և բարդ:
Կլեպերը մանրամասնել է, որ Պուտինը չի ցանկանում զավթել ողջ Ուկրաինան, սակայն ցանկանում է վերահսկողություն ստանալ Դոնեցկի ու Լուգանսկի ողջ մարզերի նկատմամբ, և հնարավոր է՝ կփորձի միջանցք բացել դեպի Ղրիմ և գրավել Մարիուպոլ նավահանգիստը:
Անդրադառնալով ԱՄՆ-ի կողմից Ուկրաինային մահաբեր զենք մատակարարելու խնդրին՝ Կլեպերը հայտարարել է, որ դա կարող է առաջացնել Ռուսաստանի բացասական արձագանքը, ով կարող է էլ ավելի ժամանակակից սպառազինություն մատակարարել անջատողականներին:
Կլեպերն ընդգծել է, որ ամերիկյան հետախուզության այդ դիրքորոշումն ամենևին էլ չի նշանակում, թե իրենք դեմ են արտահայտվում Ուկրաինային զենք մատակարելուն:
