Գեորգի Մարգվելաշվիլին Թբիլիսիում ընդունել է Հովիկ Աբրահամյանին
Новости-Грузия լրատվական գործակալության փոխանցմամբ՝ Վրաստանի նախագահ Գեորգի Մարգվելաշվիլին այսօր հանդիպել է Հայաստանի վարչապետ Հովիկ Աբրահամյանի հետ, որի ժամանակ քննարկել է տնտեսական ու մշակույթի ոլորտի հարցեր:
Հայաստանի վարչապետի գլխավորած կառավարական պատվիրակությունը պաշտոնական այցով Վրաստան է ժամանել երեկ: Նույն օրը Աբրահամյանը հանդիպել է Վրաստանի վարչապետ Իրակլի Գարիբաշվիլու հետ:
Վրաստանի նախագահի մամլո ծառայությունը հայտնել է, որ հանդիպման ժամանակ Աբրահամյանն ու Մարգվելաշվիլին հիմնականում քննարկել են երկու երկրների միջև բարեկամական հարաբերությունների հարցը: Քննարկվել է նաև առևտրային-տնտեսական ու հումանիտար-մշակութային ոլորտներում Հայաստանի ու Վրաստանի միջև համագործակցության հարցը:
«Տետ-ա-տետ» ձևաչափով հանդիպումից հետո Վրաստանի նախագահը հայկական պատվիրակությանը հրավիրել է պաշտոնական ճաշի: Հայկական պատվիրակությունը Վրաստանը լքելու է դեկտեմբերի 12-ին:
