Վրաստանը, Թուրքիան ու Ադրբեջանը քննարկելու են տարածաշրջանային համագործակցության զարգացման հեռանկարները
Новости-Грузия լրատվական գործակալության փոխանցմամբ՝ Վրաստանի արտգործնախարար Թամար Բերուչաշվիլին երեկ հայտարարել է, որ հաջորդ (այս – 168.am) շաբաթ մասնակցելու է իր թուրք ու ադրբեջանցի գործընկերների հետ եռակողմ հանդիպմանը, որը դեկտեմբերի 10-ին տեղի է ունենալու Կարսում:
Վրաստանի ԱԳՆ-ը հայտնել է, որ հանդիպման ժամանակ արտգործնախարները քննարկելու են տարածաշրջանային համագործակցության զարգացման հեռանկարները՝ ելնելով ընդհանուր շահերից, ինչպես նաև քննարկվելու են նախորդ հանդիպումներում ընդունված որոշումները:
Թուրքիայի ԱԳՆ-ն իր հերթին ընդգծել է, որ արտգործնախարարների հանդիպումների ժամանակ մանրակրկիտ գնահատական է տրվում երկկողմ ու տարածաշրջանային հարցերին: Եռակողմ հանդիպման շրջանակներում տեղի են ունենալու նաև երկկողմ հանդիպումներ: Մասնավորապես, Բերուչաշվիլին հանդիպելու է Թուրքիայի արտգործնախարար Մևլյութ Չավուշօղլուի հետ:
Կարսի հանդիպումը կլինի երեք երկրների արտգործնախարարների երրորդ հադիպումը: Առաջին հանդիպումը տեղի է ունեցել 2012 թվականի հունիսին Թուրքիայում (Տրապիզոն), իսկ երկրորդ հանդիպումը՝ 2014 թվականի փետրվարին, Ադրբեջանում (Գյանջա):
