Վահագն Չախալյանի պատասխանը՝ Արիֆ Ասկերովին. «Սկսում ես զարմանալ այս պարոնի անաստիճան լրբության վրա»
Վահագն Չախալյանը հայտարարություն է տարածել, որում պատասխանում է Արիֆ Ասկերովին.
«Սկսում ես զարմանալ այս պարոնի անաստիճան լրբության վրա, այնպիսի տպավորություն է ստեղծվում, որ իրենք ոչ միայն ադրբեջանում իշխանությունը ապօրինաբար չեն զավթել, այլև ստացել են Վրաստանի քաղաքացիների քվեները, մասնավորապես ջավախահայությանը…
Սթափվեք պարոնայք, միգուցե ձեր կողմից վարձակալված Վրաստանի նախագահ Մ. Սաակաշվիլու վարձակալության պայմանագրի ժամկետը չի ավարտվել և ևս 16 տարի գործելու է այն, սակայն նա չի կարողանալու իրականացնել իր խոստըմները, մի մոռացեք փոխվել են Վրաստանի և նախագահը, և կառավարությունը…
Նախ երկաթգծի Բաքու-Թբիլիսի-Կարս անվանումը կեղծ է, Թբիլիսի-Բաքու երկաթգիծ որպես այդպիսին մեկ դարից ավելի է գործում է, գուցե այդ բարձրագոչ անվանումը պետք է եկել , որպեսզի կարողանաք այդքան ահռելի գումարների մսխումը «օրինականացնել», բայց մի մոռացեք, որ խոսքը երկայգծի Կարս-Ախալքալաք հատվածի, Ախալքալաք-Կարծախ-Կարս հատվածի մասին է… Եվ եթե ձեզ հաջողվեց մի ողջ ժողովրդի ահաբեկելով, բանտարկելով ու գողանալով այդ ժողովրդի ունեցվածքը ինչ-որ մի կերպ կառուցել այդ հատվածը, ապա վստահ չե’ք կարողանալու մեր Մայր Հայրենիքի շրջափակումը ամրապնդել, խստացնել այդ ժողովրդի հաշվին:
Վրաստանի տարածքով անցնող և ոչ մի կոմունիկացիոն միջոցից օգտվելու արգելանք դնելու լիազորություն, առավել ևս իրավունք ադրբեջանական և ոչ մի պաշտոնյա չունի, անկախ նրանից, թե ինչքան գումար են ծախսել նրանք:
Վստահ՝ ՀՀ-ից Ջավախքի Կարծախ գյուղ եկող ցանկացած վագոն տեղ է հասնելու, եթե, իհարկե, այլ վագոններ կարողանան Կարծախ հասնել…
Եվ մի բան էլ մենք բոլորս լավ հիշում ենք, ծրագիրը սկսելուց առաջ երկուստեք հնչող հայտարարություններն ու հավաստիացումներն առ այն, որ ծրագիրը տարածաշրջանային է, նպաստելու է նրա խաղաղության ու կայունության ամրապնդմանը, ուղղված չէ երրորդ երկրների դեմ և նրանից կարող են օգտվել բոլոր ցանկացողները:
Երևում է ադրբեջանական իշխանությունները ոգեվորվելով ծրագրի մոտալուտ ավարտի մասին լուրերից, մոռանալով որ աշխարհում իրենցից և թուրքիայից բացի այլ երկրներ էլ կան և կան խաղի կանոններ որոնք փոխելու համար իրենց նավթադոլարներն, անգամ հազարապատկվելուց հետո շատ քիչ կլինեն, թևքները վերև քշտած նման հայտարարություններ են անում և դա ամենևին էլ էական չէ թե ինչ կալիբրի պաշտոնյայի բերանով…
«Խելքի աշեցեք»՝ ինչպես կասեր մեծն Ջիվանին…»:
Հիշեցնենք, որ Ադրբեջանական Trend լրատվական գործակալության փոխանցմամբ՝ «Ադրբեջանի երկաթուղիներ» ընկերության ղեկավար Արիֆ Ասկերովը հայտարարել է, թե Հայաստանի միանալու հարցը «Բաքու-Թբիլիսի-Կարս» (ԲԹԿ) երկաթուղուն կարող է դիտարկվել միայն Ղարաբաղյան հակամարտության կարգավորումից հետո:
«Ներկա փուլում ԲԹԿ-ի նախագծին կարող են միանալ բոլոր ցանկացող կողմերը՝ բացառությամբ Հայաստանի: Նախագծին միանալու իրենց ցանկության մասին արդեն իսկ հայտարարել են Ղազախստանը և Աֆղանստանը»,- ասել է նա:
