«Այն, ինչ ասաց Լևոն Տեր-Պետրոսյանը՝ իր մոտեցումն էր, իր պատկերացումներն էին»
Հարցազրույց «Ժառանգություն» կուսակցության փոխնախագահ Արմեն Մարտիրոսյանի հետ
– Ըստ Ձեզ՝ Հայաստանի քաղաքական կյանքում որևէ փոփոխություն եղա՞վ հոկտեմբերի 10-ի հանրահավաքից հետո:
– Կարծում եմ՝ այո, որոշակիորեն եղավ, իհարկե: Այդ օրը երևաց, որ Հայաստանում բավականին մեծ զանգված կա, որ պատրաստ է պայքարի: Ի դեպ, առաջին հանրահավաքի համար բավականին մեծ էր եկածների թիվը, ուստի կարծում եմ, որ հետագա զարգացումների վրա դա իր ազդեցությունը, հետքը պետք է որ թողնի:
– Ձեր հարցազրույցներից մեկում ասել եք, որ եթե հանրահավաքին բազմության Ձեր ակնկալած քանակը լինի, հասարակությունը Ձեր պատկերացրած ակտիվությունն ունենա, ապա կարճ ժամանակ անց մենք նոր իշխանություն կունենանք: Հիմա կա՞ր բազմության Ձեր ակնկալած քանակը, և արտահերթ ընտրությունների հավանականություն տեսնո՞ւմ եք:
– Ես իմ ակնկալած քանակը տեսել եմ, և եթե ընդդիմությունը ճիշտ գործի, կարծում եմ` շատ հնարավոր է` այդ արտահերթ ընտրությունները մոտ ապագայում լինեն:
– Դուք տեղյա՞կ էիք, որ եռյակը նորից շարունակելու է մնալ «հրաշալի քառյակ», ինչպես հայտարարեց Լևոն Տեր-Պետրոսյանը՝ նկատի ունենալով Ստեփան Դեմիրճյանի ՀԺԿ-ի միացումը եռյակին:
– Ասեմ, որ այդ օրը միասնական օրակարգ չի եղել. յուրաքանչյուր հռետոր, այդ թվում` նաև առաջնորդները, իրենք են որոշել իրենց ասելիքը, և այն, ինչ ասաց Լևոն Տեր-Պետրոսյանը, բնականաբար, իր մոտեցումն էր, իր պատկերացումներն էին: Այսինքն՝ մենք ոչ միայն դրան, այլև որևէ բառի կամ նախադասության տեղյակ չէինք, և դրա կարիքը բացարձակ չկար, ինչպես որևէ մեկը տեղյակ չէր մեր խոսքի նյութին:
Այնպես որ, չեմ կարծում, թե դա առանձնահատուկ մի իրավիճակ է: Ես կարծում եմ, որ եթե մենք բացենք երկրորդ շրջանակը, այսինքն՝ եռյակից հետո լինի այն լայն կոնսոլիդացիան, որը մենք ակնկալում ենք, բնականաբար, շատ ճիշտ կլինի, որ այնտեղ լինի նաև ՀԺԿ-ն և այլ կուսակցություններ ու հասարակական խմբեր: Բայց այս պահին մենք գործում ենք եռյակի ձևաչափում, և վերջին հանրահավաքին դուք տեսաք, որ երեք քաղաքական ուժերի ներկայացուցիչներն էին մասնակցում, և ողջունելով մեր ցանկացած գործընկերոջ՝ պետք է ասեմ, որ այս պահին մենք գործում ենք եռյակի ձևաչափով:
– Համամի՞տ եք այն կարծիքի հետ, որ նախաձեռնությունն այժմ պատկանում է միայն ՀԱԿ-ին ու ԲՀԿ-ին, և «Ժառանգությունն» արդեն վաղուց դուրս է մնացել գործընթացից:
– Ոչ, բացարձակապես: Ընդամենը մանիպուլյացիաների դաշտ է փորձում ստեղծել այդ կարծիքը, բայց իրականում, քանի որ ես մասնակից եմ ներքին գործընթացներին, գիտեմ՝ որոշումներն ինչպես են ընդունվում, ինչ հարցեր են քննարկվում, ուստի այդ միտքը բացարձակ տեղին չեմ համարում:
– Խոսակցություններ կան նաև, որ «Ժառանգությունը» շուտով դուրս կգա քառյակից: Հնարավո՞ր են նման զարգացումներ:
– Այս պահին որևէ նման խնդիր գոյություն չունի: «Ժառանգությունը» մնալու և համագործակցելու է քառյակի հետ:
– Արդյոք Րաֆֆի Հովհաննիսյանի ելույթը դավադրությո՞ւն էր քառյակի նկատմամբ, ինչպես շատերը բնորոշեցին, քանի որ միայն նա դեմ խոսեց ԵՏՄ-ին Հայաստանի անդամակցությանը:
– Դավադրության խնդիր ևս գոյություն չուներ: Կրկնում եմ՝ յուրաքանչյուր առաջնորդ ինքն է որոշել իր ասելիքը, ինչպես և մնացած հռետորները: Եթե պարոն Հովհաննիսյանը նպատակահարմար է գտել այդպիսի ելույթ ունենալ, ուրեմն՝ դրա բոլոր հիմքերն ունեցել է, և դա իր կարծիքն է: Նա ինչ-որ նորություն չի ասել, որն իր կամ «Ժառանգության» կարծիքը չի եղել: Այնպես որ, դավադրության մասին խոսել չի կարելի, առավել ևս, որ մենք, ըստ էության, խոսել ենք ոչ միայն այդ, այլև իշխանափոխության, իշխանության ոչ լեգիտիմ լինելու և նմանատիպ այլ հարցերի շուրջ:
– Հաջորդ հանրահավաքի օրն արդեն նշանակված է: Փակագծերը կբացե՞ք մի փոքր. ի՞նչ օրակարգով է ներկայանալու ընդդիմությունն այս անգամ:
– Փակագծերը բացելու որևէ խնդիր չեմ տեսնում: Ամենայն հավանականությամբ, մինչ այդ կլինի ղեկավարների հանդիպում: Մեր գործընկերները նմանատիպ առաջարկով հանդես են եկել, և մենք կողմ ենք այդ առաջարկին: Կարծում եմ՝ մինչև հանրահավաքը տեղի կունենա այդ հանդիպումը, որտեղ կճշտվի և՛ օրակարգը, և՛ ճանապարհային քարտեզը, և մենք արդեն ամբողջական առարկայական մոտեցմամբ հանդես կգանք ժողովրդի առջև:
